15-майдиз Докъузпара райондин Усугъчай хуьруьн СОШ-да террордиз аксивалунин комиссиядин, дежурный-диспетчеррин къулугъдин, агьалияр лап кьетIи гьалара къутармиш авунин рекьяй кардик квай отделдин ва гьамиша къуллугъдик квай Докъузпара райондин 37-нумрадин пожарный частунин работникрин иштираквал аваз террориствилин чуьруькар ва цIай кьунин дуьшуьшар арадал атайла аялар къутармиш авунин рекьяй практикада виже къвезвай гьерекатрин ва кьабулна кIанзавай эвелимжи серенжемрин рекьяй вердишвилер кьиле фена.
Чкадин агьалияр патал уьмуьрдин хатасузвал таъминарунин макьсаддалди пландин бинедаллаз тешкилай и мярекатда мектебдин 33 муаллимди, 220 аялди ва мектебдин техникадин жигьетдай кIвалах тамамарзавай къуллугъчийри иштиракна.
Атанвайбуру аялриз, муаллимриз цIай кьурла, тахьайтIа шак фидай шейэр акурла, мектебдин къене аваз са тахсиркарвал хьайи вахтунда, террористри къурху гана, басрух арадал атайла, мектебдин къене есирвилиз кьурла душмандин гьужумдикай, цIаярикай хуьн патахъай кьабулна кIанзавай серенжемрикай суалар гана, абур ахтармишна.
Хатадикай хуьн патал са чкадай маса чкадиз акъуддай вахтунда аста, дикъетлу гьерекат авун герек тирди лагьана.
Мярекатдин вилик эцигнавай месэлаяр иштиракчийри агалкьунралди кьилиз акъудна.
«Лезги газет»
