ЧИ ТЕБРИК

Гьуьрметлу Ханбиче Шихрагьимовна!

Чи вах, халкьдин руш ва шаир, ялавлу хци гафунин сагьиб, общественно-политический деятель, гзаф мярекатра халкьдин  таъсиблу векил… Аку садра ви тIварцIи чи рикIел гьикьван баркаллу крар, чIехи яржар, дережаяр гъизватIа!

Ви шаирвилин севт гзаф рикIера, мензилрани майданра зар-экв алаз рахазва. И кар халкьди, общественностди, государстводи ви зегьметдиз ганвай чIехи тIварари, наградайри, ийизвай гьуьрметрини субутзава. СтIал Сулейманан, Етим Эминан, Шарвилидин, РД-дин Государстводин премийрин, Дуствилин ордендин ва литературадин рекьяй хейлин маса лишанрин иеси тир вал Дагъустандин халкьдин шаирвилин тIварни атун дуьшуьшдин кар туш. Анжах халкьдин уьмуьрдалди яшамиш жезвай, адаз паквилелди къуллугъзавай рухвайризни рушариз ачух жезвай бахт я ам!

Ви тIвар Лезгистандивай, Дагъустандивай, Кеферпатан Кавказдивайни хейлин яргъара машгьур хьанва, дуьньядин гзаф чIаларал ви эсерар рахазва. И карди вун чидай вирибурук дамахдинни гьейранвилин гьиссер кутазва.

Чун лагьайтIа, гьамиша ви тIварцIиз ва гьиссерин гьавадиз къуллугъзавай къелемэгьлияр я. Шаирди ви тIварцIихъ гьавайда лагьанвач:

Ви зуьгьревал, ви жегьревал

Тежербур я зайифар.

Алхиш хас я гьар жуьре ваз, —

Жергедава арифар.

Лугьузва чаз ви илгьамди —

Жинс я, халис лекьерин!

Ви тарифни, ви айгьамни

Зенг я, женг я рикIерин!

Ийирди туш я гафунин,

Я гьунардин зуракIвал.

Аферин ви гьар гьарфуниз,

Хуьз гъетерин туракьвал!

Ви 80 йисан юбилей тебрикзавай “Лезги  газетдин” редакциядин коллектив.