И йикъара Урусатдин жуьреба-жуьре регионра, гьатта къецепатан са жерге уьлквейрани, Дагъустандин халкьдин шаир Расул Гьамзатован 100 йисан юбилейдиз талукьарнавай мярекатар кьиле физва. Асул мярекатар лагьайтIа, Дагъларин уьлкведа тешкилнава.

Лагьана кIанда, Расул Гьамзатов, XX асирдин Гомер СтIал Сулейман хьиз, Дагъустан вири дуьньядиз машгьур авур кьегьалрин сифтегьан жергейра ава. Са мярекатдал Расул Гьамзатовани лугьунни авунай: «Зун СтIал Сулеймана машгьур авур Дагъустанда дидедиз хьана…». И рехъ халкьдин шаирди баркаллудаказ давамарна.

Къе Расул Гьамзатован тIвар дуьньядин жуьреба-жуьре пипIера сейли я: адаз къецепатан са жерге уьлквейра гуьмбетар эцигнава, адан эсерар жуьреба-жуьре чIалариз таржума авунва, адакай гзаф кьадар ктабар акъатнава… Вири и делилри гьакъикъатдани Расул Гьамзатов чIехи шаир тирди къалурзава.

Расул Гьамзатова вичелай кьулухъ эдебиятдин девлетлу ирс тунва. Ада жуьреба-жуьре динрин, миллетрин векилар садзава, абурун арада стхавилин алакъаяр мягькемарзава. Дагъустандиз шаирдин юбилейдин мярекатрик иштиракун патал республикадилай къецепатан цIудралди мугьманар атуни чун адан ирсинив къайгъударвилелди эгечIзавайди къалурзава. Идалай кьулухъни гьа икI жедайдак чна умудар кутазва. ГьикI лагьайтIа, гафунин къуват зурба я. Шаирар лагьайтIа, гафунин устадар я. Абурун эсеррал чан аламай кьван, абурун тIварарни халкьдин рикIе жеда…

Мегьамед Ибрагьимов, «Лезги газетдин» кьилин редактор