Ашарин Закир Султанован тIварунихъ галай школада завуч яз зегьмет чIугвазвай Суна Магьамадовнадиз адан хва Шамила къулллугъзавай частунай Чухсагъулдин чар хтанва. Ана икI кхьенва: “Гьуьрметлу Суна Магьамадовна! 5189-военный частунин ракетно-артиллерийский зенитный дивизион таъминарзавай взводдин командованидин тIварунихъай ихтияр це заз хва хъсандаказ тербияламишунай Квез чухсагъул лугьудай. Куь хва Шамила къуллугъзавай вахтунда военный рекьяй пеше чирна, адакай хъсан аскер хьанва.
Физический, женгинин ва маса рекьерайни гьазур хьунай вири нормативар кьилиз акъудна. Шамила къуллугъунин рекьяй тарифлу крарик кьил кутазва. Частунин къенепатан майишатдин кIвалахрани гьамиша вичин инициатива къалурзава. Частунин аваданламишунин кIвалахда Куь хци вич халис зегьметкеш, гьар са кIвалах рикI гваз кьилиз акъуддай аскер яз къалурзава. Ватан хуьдай ватанперес хва тербияламишунал Квевай дамах ийиз жеда.
Дивизион таъминарзавай взводдин командир В.Пиков”.
Гьайиф хьи, Шамилан буба Мегьамедвели вичин хцин агалкьунар акваз агакьнач, ам рагьметдиз фена хейлин йисар я.
Шамила Дмитриево шегьерда къуллугъзава. Ада 2012-йисуз Ашарин юкьван школа, ахпа Махачкъалада халкьдин майишатдин академиядин кадастрдинни чилерин рекьяй факультет акьалтIарна. Армиядин жергейра къуллугъдай вахтунда вичин алакьунар къалурай Шамила гележегда кIвалахдин рекьени вич халис ватанперес, зегьметкеш, намуслу инсан тирди къалурда… Умудлу я хьи, адалай чешне къачудай рухваярни жеда.
Алван Рамазанова
