Халифрин Омийядрин сихилдай тир ан-Насир халифди, вичин дараматар эцигна акьалтIарайдалай кьулухъ, мукьва ксарин арада ацукьнавайла хабар кьуна: “Квез зал къведалди са регьберди кьванни ихьтин дараматар эцигна лагьана ван хьанани, вилериз акунани?”. Инсанри жаваб хгана: “Ваъ, динэгьлийрин регьбер. И жигьетдай ваз барабарбур авач. Са ни ятIани ихьтин дараматар хкажна лагьана чаз я ван хьанач, я вилериз акунач”.
Абурун гафари халифдин шадвал генани артухарна. И арада дараматдиз Андалусия вилаятдин Кордова шегьердин къази Мунзир ибн Саид атана. Ам вичин гьахълувилелди ва Исламдай авай дерин чирвилералди машгьур тир. Вучиз ятIани къазидин гьал сефилзавай, кьилни агъузнавай. Инсанрин юкьва вичин чка кьурла, халифди къазидивай эцигнавай дараматдин къизилдин къавун, адан успагьивилин гьакъиндай кьве гаф лугьун тIалабна.
Къази садлагьана шехьиз гатIунна. Адан вилин накъвар чурудилай агъуз авахьзавай. Мунзира икI лагьана: “Эй динэгьлийрин регьбер, Аллагьдал кьин кьазва, шейтIанди (къуй ам Аллагьди лянетрай) ваз и къайдада таъсирда лагьана, за фикирнавачир. Вуна адаз, ваз Аллагьди ихьтин берекатар, чIехи дережаяр ганватIани, вун дин гвачирдан гьалдиз гъидай мумкинвал гана”.
Халифдиз хъел атана: “Жува лугьузвай гафарал гуьзчивал ая. Зун ахьтинбурув гекъигиз валай гьикI алакьна?”.
Мунзира жаваб хгана: “Алакьна. Мегер Сад тир Аллагьди лагьанвачни: “Инсандиз девлет хьун Аллагьдин патай адаз авай кIанивилин лишан яз кьабулна, вири инсаният динсузриз элкъведай хьтин хаталувал авачиртIа, чна вири имансузриз абур хкаж жедай гимишдин къавар, гурарар… гудай” 43 лагьай “Безекар” сура, 33-аят (мана)”.
Халиф, геждалди чуькьни тийиз, фикиррик акатна. Аллагьдин вилик адан вилерилай умунвилин накъвар авахьна. Ада Мунзирдиз мукьва хьана лагьана: “Къуй ваз Аллагьди берекатар гурай, къази. Чав, мусурманрив, диндив и къайдада эгечIзавай. Вун хьтин инсанар пара хьурай. Вуна лагьай вири гафар гьакъикъат я”.
Гуьгъуьнлай халифди къуббадин къав чепедикай авунвай сахсидалди эвез авун буйругъна.
Гьазурайди — Агьмед Магьмудов
