Шадвилин мярекат. СтIал Сулейманан райондин культурадин дараматдин тамашачийрин зал инсанрив ацIанва.
— Машгьур шаир Седакъет Керимовадин “Чан дидедин” мани тамамарда Ханум Агъамирзоевади. — Концертдин нубатдин нумра малумарзава конферансье Ярагьмед Ярагьмедова.
Тамашачийри гурлу капар язава. Сегьнедиз милли парталар алаз жегьил руш экъечIзава. Ада назик, ширин сесиналди лугьузвай маниди тамашачияр гьейранарзава…
Вуж я ам, тамашачийриз сейли жегьил манидар Ханум Агъамирзоева? Ханума Агъа СтIалрин юкьван школада 9-классда вири тарсарай лап хъсан къиметар аваз кIелзава.
КьетIен, назик сесиниз, чинин кIалубриз килигна, гзафбуру Ханум республикада машгьур “Мирес” ансамблдин манидар Магьизар Алиевадин руш яз гьисабзавай. Дуьз лагьайтIа, зани гьакI фикирзавай.
— Магьизар Алиева зи хала, “Мирес” ансамблдин руководитель Нариман, манидар Эрзиман Османовар зи халуяр я, — чи суалдиз хъуьрез-хъуьрез жаваб гузва Ханум Агъамирзоевади. — Хтулар халайрални халуйрал къведайди я кьван! Манияр лугьунин, сегьнеда жув тухунин жигьетдай заз халади ва халуйри екедаказ куьмекарни гузва.
“Мирес” ансамблдин руководитель, бажарагълу музыкант ва дирижёр Нариман Османова райондин аялрин яратмишунрин кIвале манийринни искусстводин кружок тешкилна. 2018-йисалай ана аялрин манийрин “Куьре” ансамбль кардик ква. Ханум Агъамирзоева ансамблдин манидар я. И ансамблди ва кьилди Ханума тамамарзавай хейлин манияр лентиниз къачунва, абур республикадин муниципалитетрин телевиденийрин каналрай ва соцсетрай мукьвал-мукьвал къалурзава.
Районда тухузвай культурадинни шадвилин саки вири мярекатра Ханума активвилелди иштиракзава. Жегьил манидарди неинки чи районда, гьакIни Ахцегьа, Дербентда, Махачкъалада ва масанра вичин устадвал къалурна, адаз гурлу капар яна. Ханум районда “Голос, дети” лишандик кваз тухвай конкурсда кьве сеферда гъалиб хьана. Махачкъалада тухвай “Зи къул, Дагъустан” конкурсда ада са сеферда 2- ва са сеферда 1-чкаяр кьуна.
Ханума чаз “сирни” ачухна: чIехи хьайила, адаз Роза Максумова, Фаризат Зейналова, Жамиля Залова хьтин манидар жез кIанзава. Вун ви мураддив агакьрай, гуьзел тават Ханум!
Хазран Кьасумов
