И йикъара Сулейман-Стальский райондин Агъа Стlалрин мектебда «ФГОС – алай аямдин мектебда образованидин ери тамамвилихъ агакьарунин шартl» темадай хайи чlаланни эдебиятдин муаллимрин семинар-практикум кьиле фена. И гьакъиндай «Лезги газетдиз» райадминистрациядин пресс-къуллугъди хабар гузва.
Мярекат райондин УО-дин ИМЦ-дин пешекар Назират Азимовадин регьбервилик кваз кьиле фена. Семинардин кьилин макьсад алай девирдин технологиядикай менфят къачунин карда муаллимрик гьевес кутун я.
Тежриба раижунин серенжем кьиле фейи вахтунда хайи чlаланни эдебиятдин муаллим Эльмира Фатаховади «Хайи чlал чирунин карда аялрин гьевес хкаждай къайдаяр» темадай метлеблу доклад авуна. Муаллимди вичин докладда аямдин муаллим патал менфятлу месэлайрикай, тежрибада ишлемишиз жедай крарикай ихтилатна.
Семинардин кlвалах вири иштиракчияр хайи чlалан муаллимар тир Багьаят Салигьовадин ва Диана Аликберовадин тарсара ацукьунал куьтягь хьана.
«Лезги газет»
