ЧIал халкь садзавай къуват я гьавайда лугьузвач. 23-мартдиз Сулейман-Стальский райондин Эминхуьруьн юкьван мектебда республикадин дережада аваз лезги чIалай кьиле фейи олимпиадади и гьакъикъат мад сеферда субутна. ЧIалан сувари Кьиблепатан Дагъустандин районрайни шегьеррай атанвай цIудралди муаллимар, шаирар, жемиятдин векилар, аялар санал кIватIна, агудна, абурук руьгь кутуна.

Лагьана кIанда, олимпиада Сулейман-Стальский райондин администрациядин иштиракчивал аваз “ЛЕКИ” фондунини “Лезги газетдин” редакцияди тешкилнавай. Ам 11-классра кIелзавай аялрин арада кьиле фена. Мярекатда Ахцегь, Докъуз­пара, Мегьарамдхуьруьн, Сулейман-Стальский, Кьурагь, Хив, Дербент районрин, Дербент ва Дагъустандин Огни шегьеррин мектебра чирвилер къачузвай 52 аялди иштиракна.

Олимпиададин тапшуругъар “Лезги газетдин” кьилин редактордин заместитель, лезги чIалан муаллим Куругъли Фер­залиева гьазурнавай. Аник лезги чIа­лайни эдебиятдай 16 тест (гьар садай — 2 балл), гафунин составдин разбор (12 балл), предложение синтаксисдин разбор авун (4 балл) ва тест-диктант (20 балл) кутунвай. КIвалахриз къимет гайибурун арада “Лезги газетдин” кьилин редактор Мегьамед Ибрагьимов, “ЛЕКИ” фондунин векилар тир Руслан Мегьтихановни Раиса Жалилова авай.

Къейд ийин хьи, мярекатдин сергьятра аваз физикадинни математикадин илимрин кандидат Мариф Къадимова Кьиблепатан Дагъустандин мектебрин муаллимар патал “Халис инсан хьухь!” тIвар алай ачух тарс тухвана. Ада тарсунин эхирдай вири муаллимриз вичин “Тарни тIвар” ктаб багъишна ва абуруз чпин мектебрани ихьтин тарсар тешкилунин теклиф гана. Гуьгъуьнлай Эминхуьруьн мектебда кIелза­вай аялри мугьманар патал хъсан концерт къалурна.

Олимпиададиз атанвай гьуьрметлу мугьманрин арада Сулейман-Стальский райондин администрациядин кьил Нариман Абдулмуталибов, райондин администрациядин образованидин управленидин начальник Гьуьсейн Шихбабаев, муниципалитетдин администрациядин са жерге жавабдар ксар, филологиядин илимрин доктор, лезгийрин машгьур шаир Фейзудин Нагъиев, филологиядин илимрин кандидат, гьикаятчи Сардар Абил, Махачкъа­ла ва Каспийск шегьеррин арада авай имам аш-Шафиидин тIварунихъ галай мис­кIиндин имам Жейгьун Агьмедов, гелхенви шаир Сейфудин Шагьпазов, “Лезги ким” проектдин регьбер Эмран Гьуьсейнов, карчи  Жамалдин Тажибов, СМИ-рин векилар ва масабур авай.

Олимпиададин нетижада кIвенкIвечи вад чка тайинарна. Гьар са аялдивай къазанмишиз жезвай баллрин вини кьадар 68 тир. КIвалахриз къимет гайидалай кьулухъ малум хьайивал, 1-чкадиз (62 балл) — Сулейман-Стальский райондин ЦIийи Макьарин мектебдин ученица Эмина Рамазанова (муаллим — Рамиз Идрисов), 2-чкадиз (54 балл) — Мегьарамдхуьруьн райондин Филерин хуьруьн мектебдин ученица Пилижат Мисриханова (муаллим — Ф.Эмирова), 3-чкадиз (53 балл) — Сулейман-Стальский райондин Агъа СтIал-Къазмайрин мектебдин ученик Ислам Фатагьов (муаллим — Багьаят Салигьова), 4-чкадиз (52 балл къазанмишай кьве ­аялдиз гана) — Кьурагь райондин Гелхенрин хуьруьн мектебдин ученица Гуьзел Рамазанова (муаллим — Регина Гьуьсейнова) ва Сулейман-Стальский райондин Герейханован хуьруьн 2-нумрадин мектебдин ученица Амина Рагьмалиева (муаллим — Альбина Къадирова), 5-чкадиз (51 балл) Хив райондин ЗахитIрин хуьруьн мектебдин ученица Нуржагьан Магьмудова (муаллим — Руслан Къарабегов) лайихлу хьана. Эминхуьруьн мектебдин ученица Альбина Къадировадиз (муаллим — Жамиля Жигерова) кIвенкIвечийрин жергейрик акатун патал 1 балл бес хьанач (ада, санлай къачурла, 50 балл къачунвай). Гъалибчийрив “Лезги газетдин” редакциядин ва “ЛЕКИ” фондунин патай дипломар, Асеф Мегьманан, Мердали Жалилован, Нариман Ибрагьимован, Мариф Къадимован, Абдул Ашурагъаеван, диндин алим Ямин Мегьамедова таржума авунвай “Пак Къуръан ва адан манайрин таржума лезги чIалал” ва “Мугьаммад пайгъамбардин (къуй Аллагьдин патай салават ва саламар хьурай вичиз) уьмуьрдин рехъ” ктабар, лезги чIавар­ганар (календарар), 15, 10, 8, 5, 4 агъзур манатдин кьадарда аваз пулдин пишкешар вахкана. Гьуьрметдин грамотайриз ва 2000 манатдин кьадарда аваз пулдин пишкешриз кIвенкIвечи чкаяр кьур аялриз лезги чIалай тарсар гузвай муаллимарни лайихлу хьана.

“Лезги газетдин” редакцияди ва “ЛЕКИ” фондуни мярекат тешкилуник пай кутунай кьиле Нариман Абдулмуталибов аваз Сулейман-Стальский райондин адми­нистрациядиз ва Рагьман Османова ­регьбервал гузвай Эминхуьруьн юкьван мектебдин коллективдиз сагърай лу­гьузва.

Агьмед  Магьмудов