Мурад Мегьамедкеримов Агъа СтIалрилай я. Хайи чилихъ, чIалахъ рикI кузвай стхади «Лезги газетдин» редакциядиз вичелай алакьдай куьмекар гузва. Шаз хьиз, цIини ада «Лезги газет» — гьар са кIвализ» серенжемда иштиракзава.

Идалай гъейри, Мурад Мегьамедкеримова «Лезги газетдин» редакциядин «Лезги чIалал ктабар» тIвар алай проектдин сергьятра аваз акъуднавай «100 тапшуругъ» ктабар маса къачуна, абур лезги мектебра кIелзавай аялрал агакьарна.

М.Мегьамедкеримова «Лезги газетдин» подписка хкаж хьуник вичин пай кутунихъ галаз санал, и кардал мумкинвилер авай маса ксарни желбзава, абуруз хайи чIал хуьниз эвер гузва.

Лезги чIал хуьник ва вилик тухуник пай кутунай ва «Лезги газетдин» 100 йис тамам хьунихъ галаз алакъалу яз, редколлегиядин къарардалди, Мурад Мегьамедкеримоваз «Лезги газетдин – 100 йис» медаль гана.

Къе, 29-ноябрдиз, газетдин кьилин редактор Мегьамед Ибрагьимова Мурад Мегьамедкеримовав медаль вахкана ва редакциядин коллективдин патай адаз сагърай лагьана.

Чи мухбир