Артухни алаз…

Дагъустандин аграрийри 2025-2026- ­йи­сарин кьуьд патал алафар гьа­зурунин жигьетдай план артухни алаз ацIурнава. Идакай РД-дин хуьруьн майи­шатдин ва недай суьрсетдин министерстводин те­леграм-каналди хабар гузва.

(Шикил — РД-дин хуьруьн майишатдин ва недай суьрсетдин министерст­водин теле­г­рам-каналдай)

Чешмеди раижзавайвал, малдарри­  1,616 миллион тонндилай гзаф алафар игьтият патал кlватlнава, вилив хвенвайди 1,6 миллион тонн тиртIани. ИкI, алатай йисав гекъигайла, цIи 100 агъзур тонндин гзаф хьанва. Гьа са вахтунда къейдзавайвал, гьазурнавай векъи ва кьеж квай алафрин умуми гьисабдикай саки 1,48 миллион тонн кьурурнавай векьерал ацалтзава, сенаждал — 13,3 агъзур тонн, самарал — 122,5 агъзур тонн, силосдал 10,2 агъзур тонн.

Чешмеди раижзавай къейдерин гъавурда акьазвайвал, вири республикада и кIвалах­ар кьилиз акъудун патал чеб чпиз фидай (самоходный) ва тракторрин саки 600 косилка, 700-далай виниз «кIватIдай прессар» ва 65 комбайн кардик кутунва.

Алафар гьазурдай серенжемда кIвен­кIвечи чкадал Къизляр район хьанва: ина игьтият патал саки 215,8 агъзур миллион тонн алафар кIватIнава. 100 тонндин сергьятдилай гьакIни агалкьунралди алатнава: Бабаюрт район (саки 147 агъзур тонн), Хасавюрт район (145 агъзур тонндилай гзаф) ва Тарумовский район (115 агъзур тонн).

Чешмеди рикIел хкизвайвал, 2024-йисуз аграрийри 1,5 миллион тонн алафар игьтият патал кIватIнай.

Салан майвайрин бегьер

2025-йисуз Дагъустанда салан майвайрин бегьер, алатай йисав гекъигайла, 100 агъзур тонндин гзаф хьанва ва 1,57 миллион тонндив агакьнава. Идакай РД-дин хуьруьн майишатдин ва недай суьрсетдин министерстводин телеграм-каналди раижзава.

Чешмеди къейдзавайвал, республикадин аграрийри 39,7 агъзур гектардай салан майваяр кIватI хъувунин серенжем акьалтIарнава, санлай къачур бегьердин кьадар 6,8 процентдин гзаф яз. Хабар гузвайвал, юкьван гьисабдай бегьерлувал са гектардай 396,2 центнердиз барабар я.

Гьа са вахтунда виридалай гзаф ихьтин магьсулар, адет хьанвайвал, Леваши райондин хуьруьн майишатдин суьрсет гьасилдайбуру кIватl хъувунва — 383,2 агъзур тонн. ГьакIни еке нетижаяр Дербент (саки 321 агъзур тонн), Къизляр (саки 250 агъзур тонн) ва Акуша (121,5 агъзур тонн) районри къалурнава.

Пулунин алава такьатар

Россиядин Гьукуматдин къарардалди, 2025-йисан эхирдалди яшайишдин газификациядин программа патал Дагъустандиз алава яз 10,8 миллион манатдин кьадарда аваз пулунин такьатар ракъурда. РФ-дин кабминдин сайтда раижнавай делилрал асаслу яз, идакай РД-дин Гьукуматдин пресс-къуллугъди хабар гузва.

И такьатар яшайишдин рекьяй тайин тир кьезилвилер авай агьалийриз куьмек гунин, абуру тадаракар маса къачунин ва кIвалер газдин сетрик кутунин рекье ишлемишиз жеда. Субсидиядин кьадар 100 агъзур манатдилай тIимил тушир такьатрикай ибарат жеда.

Гьа са вахтунда раижзавайвал, чпикай­ ихтилат физвай пулунин такьатар ихьтин­ къатарик акатзавай агьалий­ри­вай къачуз жеда: гзаф аялар авай ди­де-бу­бай­ри­вай, чпин къазанжияр еке тушир агьалийривай, 1-группадин инвалидривай, инвалид аялрихъ гелкъвезвайбурувай ва мсб.

Гьакъидихъ тир чкаяр

Махачкъаладин администрацияди ма­шинар акъвазардай гьакъидихъ тир 2,8 агъ­зур чка арадал гъанва. Машинар­ акъва­зардай гьакъидихъ тир чкайрин къу­рулуш­ вич лагьайтIа, тамамдаказ 2025-йисан­ зу­ла­лай кIвалахдик акатна. Идакай, шегьер­дин администрациядин пресс-къул­лугъ­дал асаслу яз, «Дагъус­тан» РИА-ди хабар гузва.

Махачкъаладин мэр Д. Салавован гафаралди, машинар акъвазардай гьакъи­дихъ тир чкайри, бюджетдиз къазанжи гъидай мад са чешме хьунилай гъейри, шегьердин кьилин куьчейрал ацалтзавай пар кьезилардай мумкинвал гана. Ада къейдзавайвал, машин акъвазардай чкадай гьакъи гунин кар махсус приложенидин куьмекдалди ва я веб-сайтда кьилиз акъудзава. Алай вахтунда ана 10 агъзур кьван ксар регистрация авунва.

Гьазурайди — Муса  Агьмедов