1-октябрдиз Дагъустанда международный дережада аваз тешкилнавай «Устойчивое развитие горных территорий» форумдин кIвалах гатIунна. Ам 3-октябрдалди давам жеда.
Дагълух мулкар вилик тухунин месэлайриз талукьарнавай и чIехи мярекатда Россиядин жуьреба-жуьре регионрай ва къецепатан уьлквейрай атанвай 700-дав агакьна пешекарри иштиракзава. Абурун арада Индиядай, Ирандай, Белоруссиядай, Азербайжандай, Тажикистандай, Узбекистандай, Пакистандай, Къазахстандай ва са жерге маса уьлквейрай атанвай мугьманарни ава. Пуд йикъан къене гьукумдин, бизнесдин, илимдин, жемиятдин тешкилатрин векилри хуьруьн майишатдин хиле алай аямдин цIийивилер, дагълух хуьрера алай аямдин технологияр кардик кутунин, туризм вилик тухунин ва маса месэлаяр веревирдзава. Форумдин сергьятра аваз, АПК-дин хилез талукьарнавай элкъвей столар, выставкаяр, мекераяр, заседанияр, гуьруьшар ва маса мярекатар кьиле физва.
Къейд ийин хьи, форумда иштиракзавай гьуьрметлу мугьманрин арада БРИКС-дин международный форумдин президент Пурнима Анандни ава. Республикадин СМИ-рин векилрин суалриз жавабар гудайла, ада къейд авурвал, адахъ Дагъустан ва Кавказдин халкьар БРИКС-дихъ галаз алакъалу программадик кутадай ниятар ава. «Заз фадлай Махачкъаладиз мугьман жез кIанзавай, им надир шегьер я. Чна Россиядин Федерациядихъ галаз фадлай кIвалахзава. Чаз Махачкъала, Дагъустан ва Кавказдин халкьар БРИКС-дихъ галаз алакъалу программадик кутаз кIанзава. Дагълух мулкарихъ галаз кIвалахун чун патал лап важиблу я», — лагьана ада.
Форумдин кIвалахдикай гегьенш макъала «Лезги газетдин» къведай нумрада чапда.
Чи мухбир
