КIвалах къизгъин я

Дагъустанда гад агудунин кIва­лахар худда гьатнава. Идакай РД-дин хуьруьн майишатдин ва недай суьрсетдин ми­нистерстводин телеграм-каналди хабар гузва.

Чешмеди къейдзавайвал, зулун магьсулар 38,8 агъзур гектардай кIватI хъувунва, гьар са гектардай — 26,6 центнер. Санлай къчурла, 103,4 агъзур тонн техил кIватIнава.

Гатфарин магьсулар 9,8 агъзур гектардай кIватIнава, гьар са гектардай — 26,3 центнер, вири — 26,0 агъзур тонн.

Йисан эвел кьилелай инихъ

2025-йисан эвел кьилелай инихъ Да­гъустандин агьалийри электронный сертификатрин куьмекдалди 4700 ТСР (технические средства реабилитации) къачуна. Идакай Да­гъустандин Яшайишдин фондунин сайтда хабар гузва.

Чешмеди къейдзавайвал, набутвал­ авай агьалийри 2025-йисалай ТСР-ар бюджетдин гьисабдай кьилин кьве къай­да­­да къачузва — СФР-дин Дагъустанда авай отделенида государстводин «маса къачунин» серенжем (государственная за­купка) кьиле тухуникди гьакъикъи жуьреда ва электронный сертификатдин куьмекдалди.

Гьакъикъи жуьреда махсус тадарак­ заказ авур дуьшуьшда ам вахкунин муддат кардик квай государстводин икьрар хьунилай аслу жеда. Эгер икьрар ку­тIун­наватIа, техникадин такьат гуни 15 югъ кьада, начагъбур патал — 7 югъ.

Электронный сертификатди ТСР са кьадар куьруь муддатда къачудай мумкинвал гуда. Алай вахтунда ихьтин сертификат 10 йикъан муддатда туькIуьрзава. Ам къуватда амукьунин муддат лагьайтIа, са йис я. Кардик квай МИР карта аваз хьун электронный сертификат къачунин важиблу шартI я. И кар, маса къачузвай затI къейдзавайла, электронный сертификатдин сагьиб тайинарун ва казначействодай пулдин такьатар метягь маса гузвайдаз ракъурун патал герек я.

ГьакIни ТСР эвез авуниз талукь арза кхьинин дегиш­вилерни къуватда гьатнава. Гила кIва­лахдик квай техникадин­ тадарак ишлемишдай муддат эхирдал къвез ва я ТСР къачун патал чара авунвай такьатрин кьадар куьтягь жез 60 югъ амаз документар вугуз жеда, виликдай хьиз, абур ишлемишунин муддат акьалтIайла, — ваъ.

Эгер ТСР 2024-йисан эхирдалди жу­ван­ хсуси пулунихъ къачунваз хьайитIа, и дуьшуьшда СФР-дин региондин отделениди,  виликан къайдада хьиз, тадарак къачунвай касди авур харжияр эвез хъийида.

Гьам гьакъикъи жуьреда ва гьамни электронный сертификатдин куьмекдалди ТСР къачун патал арза «Госкъуллугъар» порталда, СФР-дин Дагъустанда авай отделенидин муьштерийриз къуллугъдай чкада ва я МФЦ-да вугуз жеда.

РикIел хкин, виликдай винидихъ вичикай ихтилат физвай месэладиз талукь­ малумат гайила, идарадин сайтда агьалийрин фикирдиз гъанай: эгер суалар амаз хьайитIа, абу­рувай­­ СФР-дин Да­гъустанда авай от­де­ленидин «контакт-центрадиз» зенг ийиз­ жеда, те­лефондин нумра — 8 (800) 100-00-01 (зенг пулсузди я, ислен йикъа­лай хемисдалди сятдин экуьнин 9-далай нянин 6-далди).

Милли проектрин сергьятра аваз

2025-йисуз Дагъустанда, милли проектрин сергьятра аваз, 300-лай гзаф объектар эцигунин ва ремонт авунин кIва­лахар кьиле тухуда. Ибурукай 298 объект алай йисуз кIвалахун патал вахкун герек я. И макьсадар патал 14 миллиард манатдилай гзаф пулдин такьатар фикирда кьунва. Идакай республикадин кабминдин телеграм-каналди хабар гузва.

Чешмеди раижзавайвал, сифтегьан зур йисан нетижайралди Дагъустандин мулкарал 2025-йисуз милли проектар уьмуьрдиз кечирмишунин кIвалах кьиле финикай РД-дин экономикадин ва мулкар вилик тухунин рекьяй министр Гьажи Султанова махсус мярекатдал РД-дин премьер-министр Абдулмуслим Абдулмуслимоваз хабар гана.

Кьилди къачуртIа, мисал яз, «Модерни­зация первичного звена здравоохранения» региональный проектдин сергьятра аваз, 2025-йисуз здравоохраненидин 45 объект­ арадал гъун ва медицинадин 76 идара капитальнидаказ ремонт авун, тади гьалда­ пешекарвилин медицинадин куьмек гудай центр (центр специализированной эк­стрен­ной медпомощи) (ГКБ РКБ) арадал гъун пландик кутунва. ГьакIни, маса­ махсус проектдин сергьятра аваз, целди таъминардай 4 объект, Махачкъаладин гьуьлуьн алишверишдин портуниз автомобилрин рехъ туькIуьрун ва 23 рехъ нормадив кьадай гьалдиз хкун… пландик кутунва.

Гьазурайди — Муса  Агьмедов