Дагъустанда 80 агъзурдалай гзаф агьалияр хъвадай михьи целди таъминарун патал цIийи объектар эцигзава. Идакай Махачкъалада премьер-министр Абдулмуслим Абдулмуслимован регьбервилик кваз кьиле фейи заседанидал республикадин эцигунрин, архитектурадин ва ЖКХ-дин министрдин сад лагьай заместитель Исмаил Шихсаидова хабар гана.
Объектар федеральный дережадин «Модернизация коммунальной инфраструктуры» проектдин куьмекдалди эцигзава. Абуруз акъатзавай харжийрин умуми кьадарди 1,61 млрд манат тешкилзава. ЦIийи объектар кардик акатайла, Каспийскдин, Хасавюрт райондин Сулевкент хуьруьн, Гергебил райондин са шумуд хуьруьн агьалияр хъвадай михьи целди таъминардай мумкинвал жеда.
А.Абдулмуслимова объектар тайинарнавай вахтунда эцигна акьалтIарун гзаф важиблу тирди къейдна ва гьукумдин жавабдар органриз и месэла кьетIен гуьзчивилик кутун буйругъна.
«Лезги газет»
