Кьезил аязар галукьнатIани…

Вилив хуьзвайвал, алай йисан сезонда республикадин зегьметкешри саки 25 агъзур тонн «ракъинин майваяр» (машмашар) кIватI хъийида. Идакай РД-дин хуьруьн майишатдин ва недай суьрсетдин министерстводин телеграм-каналди хабар гузва.

Чешмедин делилралди, кьезил аязар­ хьуникди бегьердин кьадар са тIимил кьван агъуз аватнава. Машмашар кIватI хъувунал гьалтайла, Гергебил, Гуьмбет, Унцукул ва Ботлих районар кIвенкIвечи жергейра ава.

Гьа са вахтунда чешмеди рикIел гъизвайвал, машмашар неинки тIямлу, гьакIни менфятлу емишар я, чпик ви­таминар, минералар квай. Тазадаказ тIуь­­нилай гъейри, машмаш­рикай компотар, мурабаяр ийизва, гьакI­ни абур кьурур­зава. Дагъдин хуьрера кIвалерин къаварал кьурурна, и емишар тIямлу «кьурай машмашриз» элкъуьрун адет хьанва.

Кьуд вацран муддатда

Дагъустанда алай йисан сифтегьан кьуд вацра 397 авария хьана. Идакай РД-дин Гьукуматдин телеграм-каналди хабар гузва.

Къейдзавайвал, ДТП-рин жуьрейрикай виридалайни мукьвал-мукьвал жезвайди транспортдин такьатар сад-сада акьун я. Гьа са вахтунда дуьшуьшар ва кьиникьар арадал атунин статистика­дин умуми рекъемар алай йисуз агъуз аватнава. ИкI, кьилди къачуртIа, 2025-йисан­ январдилай апрелдалди Дагъустанда­, винидихъ къейднавайвал, 397 авария хьа­­на. Раижзавайвал, алатай йисан и ­муддатдив гекъигайла, им 12,2 про­цент­дин  тIимил  я ( 2024-йисуз  452  ДТП  хьана).

ДТП-рин нетижада 91 кас телеф хьана. Алатай йисав гекъигайла, им 6,2 процентдин агъуз тир рекъем я. Хирер-кьа­цIар 555 касдал хьана (рекъем 11,6 процентдин агъуз аватнава).

Машинар гьалзавайбурун фикирдиз гъиз кIанзава: рекьера мукъаятвал квадармир, масадаз манийвал, хасаратвал, писвал жедайвал ийимир! Жуван къайгъу­дани хьухь, масадбурунни!

Арада мензил аваз

2025-йисан эвел кьилелай инихъ СФР-дин Дагъустанда авай отделенидин­ пешекарри 74 агъзурдалай гзаф агьалийриз арада мензил аваз меслятар ганва. Идакай СФР-дин РД-да авай отделенидин те­леграм-каналди хабар гузва.

Чешмеди рикIел гъизвайвал, агьалийривай, сад тир алакъадин центрадин нумрадиз зенг авуна (8 800 100 0001), СФР-дин Да­гъустанда авай отделениди ийизвай къуллугъриз ва куьмекдин серенжемриз та­лукь месэлайрай консультацияр къачуз жеда.

Къейд ийин хьи, СФР-дин Дагъустанда авай отделенидин операторри ислен йикъалай хемис йикъалди экуьнин сятдин 9-далай нянин 6-далди (09.00-18.00), жуьмя юкъуз лагьайтIа,  экуьнин сятдин 9-далай нянин 5 жез 15 декьикьа амаз (09.00 — 16.45.) кIвалахзава.

Серенжем акьалтIзава

Дагъустанда гьайванар гатун уьруьш­риз куьчарунин серенжем акьалтIзава. Идакай «Дагъустан» РИА-ди хабар гузва.

Кьилди къачуртIа, республикада саки 1,3 миллион хипер ва цIегьер дагъдин районрин гатун уьруьшриз куьчарунин кIва­лах акьалтI хьуниз мукьва жезва.

Къейдзавайвал, пис гьаваяр себеб яз, куьч хьун энгел хьунизни килиг тавуна, 90 процент гьайванар гьеле рекье ва я дагъларин векьин чкайра ава.

Куьчарунин серенжем гьам яхдиз, гьамни улакьдин куьмекдалди кьилиз акъуд­зава. Вири гьайванрал ветеринария­дин  гуьзчивал кьиле тухванва.

Рекъемар раижна

РД-дин здравоохраненидин министр­дин­­ заместитель Патхула Патхулаева къейдзавайвал, 2024-йисуз Дагъустандин­ сагъламвал мягькемар хъийидай ида­рай­ра­ 2 миллионни 40 агъзурдалай виниз УЗИ-дин, 2 миллиондилай виниз органрин ва системайрин функциональный диагностикадин, 120 агъзурдалай­ виниз эндоскопдалди ахтармишунар кьиле тухванва.

П. Патхулаеван гафаралди, им диаг­ностикадин еке кIвалах я. Ам шегьеррин (70 процент) ва районрин (ахтар­мишунрин умуми гьисабдикай 30 процент) медицинадин тешкилатри кьиле тухузва.

Гьазурайди — Муса Агьмедов