Дагъустандин информациядин ва печатдин Агентстводи Запорожьедин областдин Михайловский райондиз гуманитарный куьмек рекье тунва. Кьилди къачуртIа, Михайловский райондин агьалийрин игьтияжар фикирда кьуна, абуруз недай-хъвадай суьрсет, яшайишда герек къведай жуьреба-жуьре затIар ракъурнава.
Идалай гъейри, областда авай аялрин бахчайриз, мектебриз Дагъустандин авторрин ктабар, шииррин кIватIалар, Украинада кьиле физвай махсус серенжемда Россиядин Игитдин тIварцIиз лайихлу хьайи кьегьалрикай, Дагъларин уьлкведин тарихдикай, девлетлу медениятдикай кхьенвай ктабарни рекье тунва.
РД-дин информациядин ва печатдин Агентстводин регьбердин меслятчи Мурад Мегьамедкеримован гафаралди, недай-хъвадай суьрсетдихъ галаз санал Запорожьедин областдиз жуьреба-жуьре ктабарни агакьаруни чкадин агьалийриз Дагъустандин медениятдин ирсинихъ галаз мукьувай таниш жедай мумкинвал гуда.
«Мергьяматлувилин серенжем Агентстводин регьбер Арсен Юсупован теклифдалди кьиле тухвана. Чи макьсад Михайловский райондин агьалийриз куьмек гунихъ галаз санал абур Украинада кьиле физвай махсус серенжемда къуллугъзавай дагъустанвийрин кьегьалвилерихъ галазни танишарун я. И карда абуруз чна рекье тунвай ктабри куьмекда ва абурукай, шак алачиз, областдин, райондин мектебра менфят къачуда», — лагьана Мурад Мегьамедкеримова.
Чи мухбир
