Виш агъзур манат гуда

Догазификациядин программадин сер­­гьятра аваз, агьалийрин учас­ток­дин сергьятдал кьван газдин турбаяр­ пулсуз тухузва. КIвалин иесиди анжах вичин участокдал турбаяр тухунин ва гьакI­ни тадаракар (плита, котел ва мсб.) маса къачу­нин ва эцигунин кIвалахриз акъат­дай пул гуда. Идакай «Дагъустан патал газ» телеграм-каналди хабар гузва.

Чешмеди гьа са вахтунда раижзавайвал, Дагъустандин агьалийривай винидихъ къалурнавай (вичин участокдал турбаяр тухунин ва газдин тадаракар маса къачунин) макьсадриз акъатзавай харжияр патал государстводивай 100 000 (виш агъзур) манат къачуз жеда. Хабар гузвайвал, и кар патал къве къайда ава.

1. Агьалидив ада тадаракар маса къачуниз ва вичин участокдал газ тухун патал авунвай кIвалахриз акъатнавай пул вахкуда. И кар патал яшайишдин ­рекьяй хуьдай идарадив (соцзащита) и документар агакьарун герек къведа: ­пас­порт, хизандин составдиз талукь справка, кIвалахар тухун патал тешкилат­дихъ галаз кутIуннавай икьрар, тадара­кар маса къачунвайди къалур­завай чек, кIвалахрай пул ганвайди къалурзавай квитанцияр, агьали и серенжемдикай менфят къачуз жедай категориядик акатзавайди тестикьарзавай документар…
2. КIвал газдалди таъминариз ва тадаракар къачуз кIвалин иесиди пулдин­ такьатар харж тавунани ийиз жеда. И кар патал герек я: газдин компаниядихъ галаз газдин турба кIвализ гъунин патахъай­ икьрар кутIунун; и икьрар ва и серенжемдикай менфят къачуз жедай категориядик акатзавайди тестикьарзавай докумен­тар­ яшайишдин рекьяй ­хуьдай идарадиз­ (соцзащита) вугун. Яша­йишдин рекьяй хуьдай идаради газдин компанияди и макьсадриз ийизвай харжийрин гьакъи, арада масад авачиз гуда.

Вичикай ихтилат физвай и жуьредин куьмек ветеранриз, гзаф аялар авай ва я тIимил эменни авай хизанриз ва маса категорийрин агьалийриз гузва. И кардин жигьетдай генани тамам баянар «Да­гъустан патал газ» телеграм-каналдай кIе­лиз, гьакI интернетдин маса чешмейрайни чириз жеда.

РикIел хкин, виликдай чна, «Дагъустан патал газ» телеграм-каналдал асаслу яз, яшайишдин догазификациядин программадин сергьятра аваз, Дагъустанда 8 агъзурдалай виниз хсуси кIвалерин сергьят­рал газдин турбаяр тухванвайдакай хабар ганай.

КIвалахрин кьадар артухарда

Дагъустандин газовикри объектар хъуь­­­тIуьз гьазурунин кIвалахрин кьадар кьу­дай са паюнин артухарда. Идакай «Да­гъустан патал газ» телеграм-каналди хабар гузва.

Кьилди къачуртIа, чешмеди къейдзавайвал, Дагъустанда газдин майишат чимивилелди таъминардай вахтуниз гьазур хьунин серенжемдив гатIуннава. «Газпром газораспределение Дагестан» ва «Газпром газораспределение Махачкала» компанийри ремонт авунин кIва­лахрин кьадар, харждай пулдин такьатар, алатай йисав гекъигайла, 25 процентдин артухарун пландик кутунва.

Гьазурвал акунин серенжемрин сергьятра аваз, пешекарри 70 километрдилай виниз газдин сетар ва газ чара ийи­дай (газораспределительный) тахминан 300 шкафда авай тадаракар туькIуьр хъийида, газдин турбаяр ахтармишунин серенжемар кьиле тухуда, гьакI саки 4 агъзур даяхни дегишарда.

Раижзавайвал, и жигьетдай кьилин кIвалахар республикадин ругуд районда кьиле тухуда: Къайтагъ, Кьурагь, Акуша, Хасавюрт, Тарумовка ва Ногъай районра, гьакIни Махачкъала шегьерда.

Кардик акат хъувунва

РД-дин транспортдин ва рекьерин­ ма­йи­шатдин министерстводи хабар гузвайвал, Махачкъала шегьердин «Южная» автостанция кIвалах хъийиз эгечIнава.

РикIел хкин, виликдай чна Махачкъаладай Кьиблепатан Дагъустандиз автобусар, маршруткаяр рекье гьатзавай «Южная» автостанция цIийи чкадал («Современная транспортная система» ООО-дин мулкарал) хутахнавайдакай хабар ганай. Гила агьалияр вахт-вахтунда улакьра аваз тухуз-хкунин кIвалах, виликдай хьиз, «Южная» автостанциядилай кьилиз ­акъудда.

РД-дин транспортдин ва рекьерин майишатдин министерстводи гьакI умуми транспортдикай менфят къачудайла, агьалийри хатасузвилин серенжемар ва санитарный къайдаяр вилив хуьнин патахъайни  тагькимарзава.

Гьазурайди — Муса  Агьмедов