12-ноябрдиз Махачкъалада,  «Россия — зи тарих» паркуна, Россиядин журналистрин Союздин Да­гъустанда авай отделенидин 65 йис тамам хьуниз талукьарнавай шадвилин мярекат кьиле фена. Ана РФ-дин журналистрин Союздин, РД-дин гьукумдин органрин векилри, республикадин СМИ-ра кIвалахзавай журналистри, алимри, студентри ва масабуру иштиракна.

Дагъустандин журналистрин тешкилат 1959-йисуз арадал гъана. Адан сад лагьай председатель яз авар чIалал акъат­завай газетдин кьилин редактор Мегьамед Шамхалов хкянай. Гуьгъуьн­лай тешкилатдиз Мегьамед Бутаева, Гьа­жи Арипова, Иззет Алиева, Али Камалова регьбервал гана. 2023-йисалай РФ-дин журналистрин Союздин Дагъустанда авай отделенидин председателдин везифаяр «Лезги газетдин» кьилин редактор Мегьамед Ибрагьимова тамамарзава.

Мярекатдиз, журналистриз сувар мубаракиз, РФ-дин журналистрин Союздин секретариатдин кьил Денис Токарский, секретарь Тимур Шафир, РД-дин инфор­мациядин ва печатдин Агентстводин регьбер Абдуразакь Жамалутдинов, Махачкъала шегьердин администрациядин кьилин заместитель Мавлидин Маликов, Россиядин Игит Темирлан Абуталимов, РФ-дин Росреестрдин РД-да авай Управленидин кьил Арсен Пирмегьамедов, РД-дин рекъемрин рекьяй вилик финин министр Юрий Гьамзатов ва масабур атанвай. Чпин рахунра абуру Дагъларин уьл­кведин журналистрин кIвалахдин, везифайрин гьакъиндай чпин фикирар лагьана, абурун агалкьунар къейдна ва идалай кьулухъ мадни кьакьан кукIушрихъ фидай къастар хьун алхишна.

Мярекатдал рахай Мегьамед Ибра­гьи­­мова Дагъустандин отделенидин кIва­лах­дикай, яратмишдайбурун тешкилатди кьилиз акъудзавай проектрикай, тешкилзавай серенжемрикай гегьеншдиз суьгьбетна. Адан гафарай малум хьайивал, алай вахтунда уьлкведин журналистрин Союздин членрин арада 300-дав агакьна­ да­гъустанвияр ава. Йисан эхирдалди абурун кьадар 500-дав агакьун мумкин я, гьикI лагьайтIа, эхиримжи вахтара Союздик экечIиз кIанзавайбурун кьадар гзаф хьанва.

Отделенидин вилик акъвазнавай мес­­элаяр къейддайла, М. Ибрагьи­мова­­ тешкилатди Махачкъаладин адми­нист­ра­ция­­диз алай вахтунда республикадин­ га­зетринни журналрин комплекс­дин па­тав гвай авадан ийизвай сквердиз жур­на­листрин Аллея тIвар гун патал махсус­ чар рекье тунвайдакай хабар гана. Ри­кIел хкин, и месэла вилик йисарани са шу­муд­ сеферда къарагъарнай, амма адал кIукI атаначир. И сеферда респуб­ликадин мер­кездин кьилевайбуру журналистрин теклифдин пад хуьдайдак РФ-дин журна­листрин Союздин Дагъустанда авай отделенидин векилри умуд кутунва.

Вичин рахунар М. Ибрагьимова да­тIа­­на отделенидиз куьмекар гузвай РФ-дин журналистрин Союздин кьилевайбуруз ва меценатриз — РФ-дин Госдумадин депутат Жамаладин Гьасановаз, РД-дин Халкьдин Собранидин депутатар тир Имам Яралиеваз, Марат Алияроваз, Шамил Омароваз, отделенидин ревизиядин комиссиядин председатель Мурад Мегьамедкеримоваз, жемиятдин векилар тир Мамед Абасоваз, Нариман Гъазалиеваз, «Национальное возрождение» фондунин регьбер Токай Керимоваз сагърай лугьуналди акьалтIарна.

Мярекатдин сергьятра аваз, кIвалах­да тафаватлу хьанвай са жерге журналистрив шабагьарни вахкана. ИкI, РД-дин Кьил Сергей Меликован указдалди «Нур» газетдин кьилин редактор Байрам Абдуллаеваз — «Дагъустан Республикадин лайихлу журналист», «Дагъустан» журналдин кьилин редактор Марат Гьажиеваз «Дагъустан Республикадин медениятдин лайихлу къуллугъчи» тIварар гана. Ногъай чIалал акъатзавай респуб­ликадин дережадин газетдин кьилин редактор Эльмира Кожаева РД-дин инфор­мациядин ва печатдин Агентстводин Гьуьр­метдин грамотадиз лайихлу хьана.

РФ-дин журналистрин Союздин шабагьрин сагьибрин арада агъадихъ­ га­лай­ журналистарни меценатар ава: «Лез­ги­ газетдин» кьилин редактор Ме­гьа­мед Ибрагьимов ва «Дагъус­тан» РГВК-дин генеральный директор Ками­ла Гьамзатовани «Ватан» радиодин­ кьи­лин редак­тор Жалал Гьуьсейнов («Честь. Дос­­то­инство. Профессионализм» медаль), «Да­гъус­тан»­ РГВК-дин гене­ральный­ директордин­ заместитель­ Айшат­ Гьуьсенова­ни «Да­гъустан» этно­медиахолдингдин регьбер­ Арсен Юсупов («За заслуги» медаль), журналист Алик Абдулгьамидов ва «Да­гъустан» РГВК-дин къуллугъчияр Зарипат Кура­мегьамедовани Гьуьсен Къулиев («За храб­рость» медаль), «ННТ» те­ле­канал­дин шеф-редактор Гьамзат Нурмегьаме­довни «Дагестанская правда» газетдин­­ мухбир Абдула Сулейманов («За помощь людям» медаль), «Дагес­танская­ прав­да» газетдин мухбир Эмма­ Тыщенкони «Нур» газетдин жавабдар секретарь Камил Шамхалов («Ветеран журналистики» медаль). РФ-дин журналистрин Союздин Дагъус­танда авай отделенидин ре­визиядин комиссиядин председатель Му­рад Ме­гьа­медкеримов — «За поддержку прессы» ­медалдиз, Роскадастр­дин Дагъус­танда авай филиалдин пресс-секретарь ­Альберт ­Эседов ва «Нийсо Дагестан» газет­дин кьилин редактор Умар Якиев гьуьр­метдин ­лишанриз лайихлу хьана. РФ-дин жур­налистрин Союздин гьуьрметдин грамо­таяр гайибурун арада­ РД-дин Халкьдин Собранидин депутатар тир Имам Яралиев, Марат Алияров, Шамил Омаров, жеми­ятдин векил Гуьлогълан Мамедяров, ­«Яйлахдин сес» газетдин жавабдар сек­ретарь Любовь Уразаева, «Лезги газетдин» кьилин редактордин заместитель Куругъли Ферзалиев, дипломар гайибурун арада журналист Адиширин Алибегов, «Илчи» га­зетдин корректор Аминат­ Агьмедова, ­«Табасарандин нурар»­ газет­дин дизайнер Эльмира Багъда­ева, «Агъул­рин хабарар» газетдин мухбир Абдурагьман Манафов, «Гьакъикъат» газет­дин жавабдар секретарь Мегьамедгьабиб Махатов авай.

ЦIи Дагъустандин отделениди депутат Шамил Омарован куьмекдалди СтIал Сулейманан 155 йисан юбилейдиз талукьарнавай фильмайрин конкурс тешкилнавай. Гъалибчийрив дипломарни 50, 30 ва 20 агъзур манатдин кьадарда авай пулдин пишкешар Ш.Омарова вахкана. ИкI, 1-чкадиз «Замана» газетдин мухбир Эльза Чубанова, 2-чкадиз «Ватан» газетдин са шумуд мухбир ва 3-чкадиз Кьасумхуьруьн телевиденидин кьилин редактор Эльвира Небиева лайихлу хьана.

РД-дин рекъемрин рекьяй вилик финин министр Юрий Гьамзатова Каспийскдин рекъемрин форум тухудайла, информационный рекьяй куьмекар гайи республикадин са шумуд СМИ-дин векилрив разивилин чарар вахкана.

Мярекатдин сергьятра аваз «Молодость гор» ансамблди «Лезгинка» кьуьл авуна, Дагъустандин госфилармониядин манидарри — Тахмина Мираяни Абдул Мурадова манияр тамамарна. Буйнакскдин райондин Чиркей хуьре авай «Путь к успеху» тIвар алай центрада тербияламиш жезвай аялри СтIал Сулейманан юбилейдиз талукьарнавай сегьне къалурна.

Агьмед Магьмудов