Бегьер кIватI ­хъийизва

Дагъустанда прунздин бегьер кIватI хъувунив эгечIнава. Идакай рес­пуб­ли­кадин хуьруьн майишатдин ва не­дай суьрсетдин министерстводин те­леграм-каналди хабар гузва. Регионда алай йисуз прунзди рекорддин кьадардин майданар кьунва — 34,7 агъзур гектар. Къейдзавайвал, и мулкарин умуми­ гьисабдикай чIехи пай — 18,5 агъзур гектар — Къизляр райондал ацалтзава. Респуб­ликадин мад 5 районда прунзди кьунвай мулкарин кьадар са агъзур гектардилай алатзава.

Алай вахтунда прунздин бегьер 3 агъзур гектардай кIватI хъувунва.

«КIвалахра 125-далай гзаф комбай­нияр кардик кутунва, алава техника къунши регионрай желбзава», — кхьизва РД-дин хуьруьн майишатдин ва недай суьрсетдин министерстводин теле­грам-каналди.

Чешмеди къейдзавайвал, уьлкведин хуьруьн майишатдин министерст­води гузвай куьмекдин серенжемар кардик кутун себеб яз, дуьгуь гьасилунин рекъемар хейлин виниз акъатнава.

Шарип Шарипован гафаралди, и сектордиз региондин бюджетдай чара ийизвай пулдин такьатрин кьадарни хейлин артух хьанва. Кьилди къачуртIа, эхиримжи пуд йисан къене прунзчивал вилик тухуниз саки миллиард манат чара авуна.

Чешмедин къейдерай малум жезвайвал, гьам федеральный, гьамни региондин дережада талукь ксари ва хуьруьн майишатдал машгъулбуру саналди чалишмишвилер авуникди 2017-йисалай 2023-йисалди дуьгуьдин саки 11 агъзур инженерный цIийи къурулушар туькIуьрнава ва кардик квай 21 агъзур цIийи кьилелай туькIуьр хъувунва.

Пайгарвал ­артухарзава

РД-дин энергетикадин ва тарифрин министерстводин телеграм-каналди хабар гузвайвал, зулунни хъуьтIуьн муддатдиз гьазур хьунин серенжемрин сергьятра аваз, пешекарри Докъузпара райондин Къурушрин хуьре трансформаторный цIийи пункт эцигнава.

Чешмедин къейдерай малум жезвайвал, и карди чкадин агьалияр электроэнергиядалди таъминарунин кIва­лах­дин пайгарвал хъсанардай ва йисан мекьи вахтунда электроэнергиядин такьатар дурумлу гьалда хуьн таъминардай мумкинвал гуда.

29 млн манат

Дагъустандин Гьукуматди респуб­ликадин кьуд районда газдалди таъминардай объектар эцигунин ва цIийи кьилелай туькIуьр хъувунин серенжемдин проектрин документар гьазурун патал 29 миллион манат чара авунва. Идакай РД-дин энергетикадин ва тарифрин министерстводин телеграм-каналди хабар гузва.

Чешмеди къейдзавайвал, и серенжемди Къизилюрт,  Хасавюрт районар, Буйнакскдин райондин Чиркей, Къаякент райондин Къаякент хуьрер газдалди таъминарунин кIвалах дурумлу ийидай мумкинвал гуда:

Ведомстводин телеграм-каналди ха­бар гузвайвал, алай вахтунда (малумат 23-сентябрдиз чапнава — ред.) газ чара ийидай (газораспределительный) комплексдин карханаяр гьазур хьуни 74 процент тешкилзава.

Игьтияж ава

Нормативдин истемишунрал асаслу яз, Махачкъала шегьердиз зирзибил вегьедай 2700 контейнердин майдандин игьтияжвал ава. Идакай, шегьердин мэрдин гафарал асаслу яз, «Да­гъустан» РИА-ди хабар гузва.

Къейдзавайвал, алай вахтунда рес­публикадин меркезда, санлай къачурла, амукьаяр кIватIдай 1008 пункт кардик ква, абурукай 600-лай виниз кадастрдин учетдал ала.

Жуьреба-жуьре чкайра кIватI жезвай амукьайрин кьадардиз килигна, шегьердин чара-чара мулкарал зирзибил вегьедай къапар кардик кутун патал виликдай шегьердин талукь тир органрал  контейнеррин майданар инвентаризация авун ва абур эцигуниз талукь къурулушда дегишвилер тун тапшурмишнай.

И кар ахтармишна, къимет гайидалай кьулухъ шегьерда зирзибил вегьедай алава 60 пункт туькIуьрнава. Хабар гузвайвал, амукьаяр гадардай къапар эцигдай цIийи участокар жагъурунин ва абур кадастрдин учетда тунин кIвалах давам жезва.

Гьазурайди — Муса  Агьмедов