4,5 сеферда артух хьанва
Дагъустанда цIуд йисан къене дуьгуь гьасилун 4,5 сеферда артух хьанва. Идакай, РД-дин хуьруьн майишатдин ва недай суьрсетдин министрдин сад лагьай заместитель Шарип Шарипован гафарал асаслу яз, Дагмелиоводхоздин телеграм-каналди хабар гузва.
Чешмеди къейдзавайвал, уьлкведин хуьруьн майишатдин министерстводи гузвай куьмекдин серенжемар кардик кутун себеб яз, дуьгуь гьасилунин рекъемар хейлин виниз акъатнава. ИкI, эгер 2013-йисуз Дагъустанда 34,4 агъзур тонн дуьгуь гьасилнавайтIа, шаз адан кьадар 156,5 агъзур тонндал кьван хкаж хьанва. Къейдзавайвал, ихьтин нетижа арадал атун прунз цазвай майданрин кьадар 9,9-далай 33 агъзур гектардал кьван артухарунихъ галаз алакъалу я.
Шарип Шарипован гафаралди, и сектордиз региондин бюджетдай чара ийизвай пулдин такьатрин кьадарни хейлин артух хьанва. Кьилди къачуртIа, эхиримжи пуд йисан къене прунзчивал вилик тухуниз саки миллиард манат рекье тунва.
Чешмедин къейдерай малум жезвайвал, гьам федеральный, гьамни региондин дережада талукь ксари ва хуьруьн майишатдал машгъулбуру (сельхозпроизводители) саналди чалишмишвилер авуникди 2017-йисалай 2023-йисалди прунздин саки 11 агъзур инженерный цIийи къурулушар (новые рисовые инженерные системы) туькIуьрнава ва кардик квай 21 агъзур цIийи кьилелай туькIуьр хъувунва.
Къейдзавайвал, и серенжемар кьиле тухуни Дагъустандиз хуьруьн майишатдин секторда кьунвай вичин чка мягькемардай ва дуьгуь гьасилун артухардай мумкинвал гана. И делилди гьам регионда, гьамни, санлай къачурла, уьлкведа недай суьрсетдин патахъай хатасузвал мягькемарзава.
Улакьар куьгьне хьанва
РД-дин транспортдин ва рекьерин майишатдин министерстводи Каспийскдин ва Махачкъаладин агьалийри и кьве шегьердин арада автобусар кьериз-кьериз физва лугьуз ийизвай наризивилерин гьакъиндай баянар гана.
Малум хьайивал, винидихъ ихтилат физвай месэла арадал атунин себеб автобусар лап гьалдай финихъ, гьакIни пулдин такьатрал гьалтайла, агьалияр санай-масаниз тухудай автотранспортдин карханайра гьалар писбур хьунихъ галаз алакъалу я.
Министерстводин делилралди, гзафни-гзаф 100-нумрадин маршрутда къекъвезвай, пара инсанар гьакьдай «Метан» автобусрин, гьакIни, инсанар гьакьунал гьалтайла, юкьван дережадинбур тир 100 «а» нумрадин автобусрин кIвалахдик кьецI акатзава.
Гьа са вахтунда хабар гузвайвал, троллейбусрин кIвалах пулдин такьатралди таъминвал авачирвиляй михьиз акъваз хьанва. Къейдзавайвал, Махачкъаладин троллейбусрин управлениди пулдин такьатар, рекьин къимет екеди хьунай хгузвай эвездин пулар хьиз, шегьердин бюджетдай къачузвайди я.
Гьазурайди — Муса Агьмедов
