Газдиз талукь ­серенжемар

Дагъустанда 2025-йисан эхирдалди, Газпромдин программадин сергьятра аваз, агьалияр яшамиш жезвай 200-далай виниз чкайра газдин сетар эцигун пландик кутунва.

«Дагъустан патал газ» телеграм-каналди хабар гузвайвал, идакай «Газпром» ПАО-дин Департаментдин начальник Владимир Маркован, «Газпром межрегионгаз» компаниядин генеральный директор Сергей Густован ва республикадин сад лагьай вице-премьер Манвел Мажонцан иштираквал аваз кьиле тухвай совещанидал лагьана.

Чешмедин делилралди, идалайни алава яз, 36 ГРС (газораспределительная станция) цIийи исте­ми­шунрив кьадай жуьреда ва гьакIни газ агакьардай пуд турба (газопровод-отвод) цIийикIа туькIуьр хъийи­да. Къейдзавайвал, и серенжемар кьиле тухуни рес­публикадин чIехи шегьеррив ва са жерге районрив агакьарзавай газдин кьадар артухардай мумкинвал гуда.

ЦIийи жуьредин фу

Дагъустанда чкадин изобретателдин рецептдин бинедаллаз дармандин (целебный) фу арадал гъунин кIвалах къайдадик кутада. Идакай «Дагъустан» РИА-ди хабар гузва. Чешмеди кхьизвайвал, вичикай ихтилат физвай и рецепт туькIуьрнавайди чкадин агьали, алим, физик-изобретатель Пайзула Исаев я.

Кьилди къачуртIа, чешмеди къейдзавайвал, РД-дин промышленностдинни алишверишдин минист­ер­стводиз дармандин фу акъудунин кIвалах къайдадик кутаз кIанзава. И серенжемдиз талукь месэла веревирд авун патал ведомстводин кьил Низам Халилова Пайзула Исаевахъ галаз гуьруьшни кьиле тухвана. Мярекатдал гьакIни РД-дин хуьруьн майишатдин ва недай суьрсетдин министерстводин отделдин начальникдин заместитель Ражаб Ражабоваз ва Махачкъаладин фу чрадай 4-нумрадин заводдин директор Далгат Бийбулатоваз теклифнавай.

Къейдзавайвал, гуьруьшдин иштиракчийри дармандин фу гзаф кьадарда акъудунин кIвалах тешкилунин мумкинвал веревирдна.

Чешмеди кхьизвайвал, Исаева туькIуьрнавай фу арадал гъидай къайда адетдиндалай тафаватлуди я. Адан рецептди чранвай фак гзаф кьадарда менфятлу затIар хуьдай мумкинвал гузва.

Малум хьайивал, цIийи жуьредин ризкьи Махачкъалдин фу чрадай 4-нумрадин заводда акъуд­дай къарар кьабулнава.

Агъуз къиметар

Бензиндин юкьван гьисабдин къиметрал гьалтайла, Да­гъус­тан Республика, Кеферпатан Кавказдин федеральный ок­ругдин амай субъектрив гекъигайла, виридалайни агъуз къиметар авай регионрик акатзава. Идакай «Дагъустан» РИА-ди хабар гузва.

Росстатдин делилралди, 2024-йисан майдин нетижайри къалурзавайвал, Дагъустандин заправкайрал юкьван гьисабдалди 1 литр бензиндин къимет 55 манатни 96 кепек тир. Чечняда и рекъем агъузди я — 54 манатни 95 кепек.

Гьа са вахтунда 2024-йисан июндин вацран юкьвара хьиз уьлкведин 5 субъектда автомобилра цадай бензиндин къимет агъуз аватнавайди тайин хьанва. Къейдзавайвал, виридалайни гзаф къиметар аватнавай регионар агъадихъ галайбур я: Бурятия Респуб­лика (-0,3 процент) ва Саратовдин область (- 0,2 процент).

35 лифт дегишарда

Дагъустанда, 2024-йисуз тамамдаказ ремонт авунин прог­раммадин сергьятра аваз, гзаф квартирайрикай ибарат кIва­лера 35 лифт дегишарун пландик кутунва. Идакай «Дагъус­тан» РИА-ди хабар гузва.

Къейдзавайвал, лифтер дегишарунин сергьятра аваз, кьиле тухудай кIвалахрин къимет, санлай къачурла, 115 миллион манат жеда. Мисал яз, анжах са Махачкъалада цIийи лифтер агъадихъ галай адресра эцигдайвал я: Айвазован тIварцIихъ галай куьче,          8 «а», 6 «б», Каммаеван тIварцIихъ галай куьче, 2 «а», 1-Петрдин тIварцIихъ галай проспект, 75, 109 «д», ­Абдулгьаким Исмаилован тIварцIихъ галай куьче, 72.

Чешмеди рикIел хкизвайвал, 2023-йисуз 18 кIвале 51 лифт дегишарнай. Санлай къачурла, и серенжемар кьиле тухунин къимет 144 миллион манат яз къалурнава.

Гьазурайди — Муса  Агьмедов