Куьмек гуда
Хуьруьн майишатдин гьайванрин сар ва хамар гьялдайбуру Дагъустанда гьукуматдин патай куьмек къачуда. И макьсадар патал региондин бюджетдик алай йисуз 100 миллион манат кутунва. Идакай РД-дин хуьруьн майишатдин ва недай суьрсетдин министерстводин телеграм-каналди хабар гузва.
Чешмеди, республикадин вице-премьер Абдулмуслим Абдулмуслимован гафарал асаслу яз, хабар гузвайвал, и такьатар вичикай ихтилат физвай продукция гьялдай чкаяр арадал гъунин ва абур вилик тухунин кардиз рум гун патал чара авунвайди я.
Хабар гузвайвал, пулдин и такьатар кьезил промышленностдин кIвалахдал машгъул карханайри сар ва хамар гьялун патал техника къачуниз харж авур пулдин са кьадар пай эвез хъувун патал субсидияр хьиз гуда.
КIвалах виликди тухуда
РД-дин хуьруьн майишатдин ва недай суьрсетдин министерствода кьиле тухвай махсус совещанидал раиж авурвал, Дагъустанда 1990-йисарин юкьварилай инихъ дуьгуь гьасилун 13 сеферда артух хьанва. Идакай ведомстводин телеграм-каналди хабар гузва.
Чешмеда къейдзавайвал, уьлкведин хуьруьн майишатдин набататрин рекьяй (растениеводство) департаментдин директор Роман Некрасова тухвай и мярекатдал малум хьайивал, Дагъустандин чилери и жуьредин магьсулар цун патал майданар генани 20 агъзур гектардин артухардай ва 50 агъзур гектардив агакьардай мумкинвал гузва.
Къейдзавайвал, и совещанидал месэла гьялунин кIвалахдик ВКС-дин режимда аваз РФ-дин хуьруьн майишатдин министерстводин мелиорациядин департаментдин директор Максим Боровойни экечIна. Анал гьакIни къаналар, яд ахвахьдай коллекторар туькIуьр хъувуниз ва абур михьи авуниз, дигидай цин къиметриз талукь месэлаярни къарагъарна. Телеграм-каналда хабар гузвайвал, аграрийрин вири къейдер уьлкведин хуьруьн майишатдин министерстводи веревирд авуниз къачунва.
Мад са электростанция
Дагъустанда ракъинин мад са еке электростанция эцигдайвал я. Къейдзавайвал, ам уьлкведа и жигьетдай хкажнавай лап чIехи объектрикай сад жеда. Идакай РД-дин энергетикадин ва тарифрин министерстводин сайтда хабар гузва.
Чешмеди кхьизвайвал, и кIвалах РД-дин гьукуматдин «Солар Системс» компанийрин дестедихъ галаз санал кIвалахуниз талукь яз кутIуннавай икьрардин бинедаллаз кьилиз акъудзава.
ИкI, и серенжемдин сергьятра аваз, республикадин мулкарал Дербентдин ракъинин элгектростанция эцигда, адан гужлувал 100 МВт-дикай ибарат жеда. Хабар гузвайвал, и энергокъурулушдин куьмекдалди республикади йисан къене сятда 140 млн. КВт-дилай виниз ракъинин энергия къачуда.
ГьакIни чешмеди кхьизвайвал, ихьтин чIехи объект хкажуни республикадиз датIана кIвалахдай 25 чка гуда. Гьа са вахтунда электростанциядин эцигунрин кIвалахрал 200-дав агакьна ксар желбда.
Телеграм-каналдин делилралди, Дербентдин ракъинин электоростанция тахминан 2025-йисуз кардик кутада, ам эцигунрин кIвалахар лагьайтIа, цIи гатIунда.
Кьилинди — разивал авун
Республикадин тади гьалда медицинадин куьмек агакьардай клинический духтурханади 2023-йисуз кьиле тухвай кIвалахрин нетижаяр кьуна. Идакай идарадин телеграм-каналди хабар гузва.
Чешмеди къейдзавайвал, идарадин алатай йисан нетижайрин гьахъ-гьисаб РКБСМИ-дин (Республиканская клиническая больница скорой медицинской помощи) кьилин духтур Мегьамед Иманалиева раижна. Адан гафаралди, 2023-йисуз духтурханада 6852 операция кьиле тухвана. И рекъем, 2022-йисав гекъигайла, 10 процентдин гзаф я. Йисан къене стационардин шартIара саки 14 агъзур агьалидив медицинадин куьмек агакьарна. Кьилин духтурди гьакIни къейд авурвал, виниз тир технологиядин къаришмишвал авай серенжемар кьиле тухунин кьадарни артух хьанва. ИкI, алатай йисуз ВМП (высокотехнологичная медицинская помощь) программадалди ОМС-дин сергьятра аваз 1347 операция кьилиз акъудна. Виниз тир технологиядин жуьреда медицинадин куьмекар гунин кIвалах лагьайтIа, рикIинни дамаррин хирургиядин, нейрохирургиядин, абдоминальный хирургиядин хилерай агалкьунар аваз вилик физва .
Чешмеди кхьизвайвал, М.Иманалиев духтурханадин агалкьунрихъ галаз санал 2024-йисан планрикай ва кIвалах вилик тухунин жигьетдай авай мумкинвилерикайни рахана. Адан гафаралди, сифте нубатда кIвалахда медицинадин куьмек агакьарунилай агьалийри разивал авун вилив хуьда.
Гьазурайди — Муса Агьмедов
