Спартакиадада гъалиб хьана
Алатай гьафтеда медицинадин хиле зегьмет чIугвазвайбурун арада кьиле фейи спартакиадада Дагъустандин мусибатрин медицинадин центрадин къуллугъчийри 1-чка кьуна.
Духтурриз, медицинадин хилез чпин уьмуьр бахшнавай ксариз спортдихъ инсандин сагъламвал патал гьикьван зурба метлеб аватIа чизва. Махачкъалада, Е.Исинбаевадин тIварунихъ галай стадиондал, спортдин са шумуд жуьредай, гьа гьисабдай яз волейболдай, столдал къугъвадай теннисдай, акъвазай чкадилай яргъаз хкадарунай, чукурунай, шахматрай ва шашкайрай кьиле тухвай спартакиадада иштиракай 500-далай виниз духтурри и кар мадни субутна. Идалайни гъейри, медицинадин къуллугъчийри ГТО-дин нормаярни вахкана.
Фикир чирда
РД-дин ТФОМС-дин пресс-къуллугъди хабар гузвайвал, “Здравоохранение” милли проектдин “РФ-дин здравоохраненидин сифтегьан хел цIийи хъувун” федеральный проект кьилиз акъудун яз, страховой полисдин бинедаллаз куьмек агакьун лазим тир агьалийриз ийизвай къуллугърин ери ахтармишун патал абурун фикир чирда (соцопрос кьиле тухуда).
И кардал “Макс-М” АО-дин Махачкъаладин филиал машгъул жеда. Страховой компаниядин векилди медидарада яратмишнавай шартIарикай, духтурдин патав фин патал виликамаз учир кьун тешкилнавай гьалдикай, персоналдин дикъетлувиликай, куьмек агакьарзавай вахтуникай, гьакIни азарлу кас духтурдилай рази яз амукьнатIа, хабарар кьада. Жавабри регионда четин месэлаяр дуьздал акъудиз, гележегда абур гьялдай мумкинвал жагъуриз куьмекда. Гьавиляй Дагъустандин ТФОМС-ди республикадин агьалийривай хабарар кьунин мярекатда активвал къалурун герек я.
Важиблувал къейдна
19-сентябрдилай 25-сентябрдалди чи республикада “Рапар янавай аялар — сагълам гележег” лишандик кваз Дагъустандин здравоохраненидин министерстводи кьиле тухвай серенжемдин макьсад аялриз азаррин вилик пад кьадай рапар ягъунихъ еке важиблувал авайдал фикир желб авун тир.
Ана республикадин общественный сагъламвал хуьнин ва азаррин вилик пад кьунин центрадин, гьакI садакай масадак акатдай азаррин больницадин (РЦИБ) гигиенадин хиляй духтурри активвал къалурна.
Эхиримжи йисара азарриз акси рапар ягъуникай кьил къакъудзавай диде-бубаярни гзаф гьалтзавайди сир туш. Минздравдин кьилин инфекционист, садакай масадак акатдай азаррин кафедрадин доцент Саният Мегьамедовади ДГМУ-дин лечебный ва стоматологиядин факультетрин 1-курсуна кIелзавай студентар патал кIелай лекция и жигьетдай гзаф маналуди хьана. Ада анжах виниз тир пешекарвал авай духтурдилай, аялдиз и ва маса азардиз акси раб ягъунихъ иммунитет патал авай важиблувал аннамишуналди, гъвечIи пациентрин сагъламвал ва уьмуьр хаталувиликай хуьз алакьдайдахъ инанмишарна.
«Лезги газет»
