Алатай гьафтедин эхирра Буйнакскда хар къунин нетижада шегьердин яшайишдин метлеб авай объектриз, чкадин агьалийрин кIвалериз, эменнидиз еке зиянар хьанва. Ихтилат кьакьан гьавайрин 33 кIваликай, 750-дав агакьна кьилдин ксарин кIвалерикай, 7 мектебдикай, аялрин 14 бахчадикай физва. Шегьердин бязи районра цин, газдин, электричестводин къурулушризни зиянар хьанва, цIудралди агьалийрин улакьрин шуьшеяр ханва. Буйнакскдин мэр Исламудин Нургудаеван гафаралди, чпин эменнидиз хасаратвилер хьанвайдакай администрациядив хабар агакьарнавай агьалийрин кьадар 2000-далай алатнава.
РД-дин Кьил Сергей Меликован тапшуругъдалди, гьяд юкъуз Буйнакскдиз республикадин премьер-министр Абдулмуслим Абдулмуслимов фена, арадал атанвай гьаларихъ галаз чкадал таниш хьана. Ада зиянар хьанвай гьар са касдив государстводин патай куьмек агакьдайди къейдна, хар къунин нетижада хьанвай хасаратвилерин гьахъ-гьисаб кьадай комиссияр тешкилун тапшурмишна.
А.Абдулмуслимован буйругъдалди, тIебиатдин завалдикди зиянар хьанвай Украинада кьиле физвай серенжемдин кьве иштиракчидин хизандиз гъиле-гъилди 100 агъзур манатдин кьадарда аваз пулдин куьмек гана. Ражабоврин ва Расуловрин кIвалерин къавар барбатI хьанва, сварар атуникди кIвалерин къенепатаз яд авахьнава. РД-дин Гьукуматдин пресс-къуллугъди хабар гузвайвал, абуруз ремонтдин кIвалахар кьиле тухузни куьмекар гудайвал я.
И йикъара Буйнакскдиз РД-дин Кьил Сергей Меликова ганвай тапшуругъар тамамарун патал республикадин са жерге министерствойринни ведомствойрин векилар фена. Кьилди къачуртIа, абурун арада РД-дин образованидин ва илимдин, транспортдин ва рекьерин майишатдин, здравоохраненидин, зегьметдин ва яшайишдин рекьяй вилик финин, промышленностдин ва алишверишдин министерствойрин кьилер, РД-дин Халкьдин Собранидин депутатар ва масабур авай. Виридан макьсад сад я: жезмай кьван фад шегьердин агьалийриз хьанвай зиянрин кьадар тайинарун ва абуруз арадал атанвай чIуру гьалар арадай акъудиз куьмекар гун.
Чи мухбир
