Диндин алим Ямин гьажи Мегьамедова гьазурнавай «Пак Къуръан ва адан манайрин таржума лезги чIалал» ктабдиз РД-дин муфтиятдин экспертрин дестеди разивилин къимет ганва. Къейд ийин хьи, виликдай и ктаб Урусатдин Муфтиятдин ва РАН-дин востоковеденидин институтдин муьгьуьрар алаз кьуд сеферда (садра — Мединада) чапдай акъатна. Гила абурал Дагъустандин муфтиятни алава хъхьанва.
Алатай гьафтедин эхирра РД-дин муфтий Агьмад гьажи Абдуллаева лезги жемиятдин векилрихъ галаз гуьруьш кьиле тухвана. Ана РД-дин милли сиясатдин ва динрин крарин рекьяй министр Э.Муслимова, Махачкъаладин мэрдин заместитель С.Исакьова, РД-дин Хатасузвилин советдин секретардин заместитель С.Гьамидова, Я.Мегьамедова ва масабуру иштиракна.
Республикадин муфтийди Къуръандин аятрин манаяр лезги чIалаз элкъуьрун хушдиз кьабулна ва Ислам дин машгьур авунин карда Дагъларин уьлкведин алимри еке зегьмет чIугвазвайди къейдна.
Аллагьди чи халкьдиз и кар менфятлу авурай!
«Лезги газет»
