Ачух тарсар
Россиядин Банкуни онлайн-тарсара Дагъустандин аялар финансрин рекьяй савадлубур хьун вуч патал герек ятIа, гьадакай суьгьбетда.
18-сентябрдиз Россиядин Банкунин савадлувал артухарунихъ элкъуьрнавай “Школайра кIелзавай аялар патал финансрин рекьяй савадлувал артухардай онлайн-тарсар” проектдин зулун сессия башламиш хьанва. Ачух эфирда кьиле тухудай 22 тарсунин темаяр хсуси финансриз, страхованидиз, финансрин рекье ийизвай луту-птувилериз, карчивилиз, налогриз ва пенсийрин месэлайриз талукь я. Идалайни гъейри, мектебрин чIехи классра кIелзавай аялриз уьмуьрдин пеше хкягъун кьезиларун патал кьилдин темаяр гьазурнава. Онлайн-тарсар 2019-йисан 18-декабрдалди давам жеда, хабар гузва Отделенидин — Россиядин Банкунин Кьиблепатан ГУ-дин Дагъустан Республикада авай Милли банкунин пресс-къуллугъди.
РикIел хкин, гатфарин сессиядин нетижайралди, килигнавай онлайн-тарсарин кьадардал гьалтайла, Дагъустан Республикади СКФО-дин регионрин арада -1 лагьай, Россиядин регионрин арада 2-чка кьунва. Россиядин Банкунин проектда республикадин 365 школади иштиракна. Виридалайни еке итиж мектебра кIелзавай аялри вебинарриз авуна — 33 агъзур сеферда килигна. Аялриз виртуальный алемда хатасузвал хуьз, пул акьуллудаказ гьикI хуьдатIа ва артухардатIа чирна.
“Россиядин банк тарсар тухудай вахт къулайди жедайвал ийиз алахъиз хьана. Гьар гьафтеда тарсар башламишдай вахт дегиш жезва, ида муаллимриз онлайн-трансляция тешкилдай виридалайни къулай вахт хкядай мумкинвал гузва. Трансляцийрик неинки умуми образованидин школайривай, колледжривай, гьакIни интернатривай экечIиз жезва. Гьар са аялдивай вичин рикIе авай суал гуз жезва. Гьаниз килигна, финансрин базардин пешекарриз суал гун патал финсавадлувилин тарсарик активнидаказ экечIна кIанда”, — лугьузва Отделенидин — Россиядин Банкунин Кьиблепатан ГУ-дин Дагъустан Республикада авай Милли банкунин управляющийдин заместитель Светлана Бацынади.
Россиядин Банкуни Дагъустанда финансрин жигьетдай агьалийрин савадлувал артухарунин месэладиз еке фикир гузва ва Ачух ракIаррин югъ кьиле тухузва. Махачкъаладин Даниялован тIварунихъ галай куьчедин 29-дараматда авай Россиядин Банкуниз винидихъ чпикай лагьанвай месэлайриз итиж ийизвай гьар са агьалидивай 28-сентябрдиз къвез жеда. Музейдиз ва лекторийдиз фин патал телефондин агъадихъ галай нумрадиз зенг авуна — (8722) 67-84-80, — я тахьайтIа Банкунин официальный сайтдин — http://www.cbr.ru -куьмекдалди арза гана кIанда.
21 млрд манат къачунва
2019-йисан сифтегьан 6 вацра Дагъустан Республикадин агьалийриз банкари, санлай къачурла, 21,4 миллиард манатдин кредитар ганва. Абурукай 4,9 миллиард манат ипотека, яни яшайишдин кIвалер маса къачун патал чара авунва. Алатай йисан гьа и вахтунив гекъигайла, малум жезвайвал, агьалийри къачунвай кредитрин кьадар 1,2 сеферда артух, дагъустанвийри яшайишдин кIвалер ва шейэр кредитрин куьмекдалди къачузвай дуьшуьшар гзаф хьанва. И кардин себеб, гьисабзавайвал, кредит яз къачузвай такьатрин къимет (процент) тIимил хьун я.
Чара авунвай кредитрин такьатрин арада яшайишдин кIвалер маса къачун патал кьилдин ксариз ганвай кредитри, санлай къачурла, 24,9 процент тешкилзава. Январдилай июндал кьван вахтунда дагъустанвийри ипотекадин 1945 кредит къачунва. Им алатай йисан кьадардилай 215-дан гзаф я, хабар гузва Отделенидин — Россиядин Банкунин Кьиблепатан ГУ-дин Дагъустан Республикада авай Милли банкунин пресс-къуллугъди.
Виридалайни гуьгъуьна ава
РФ-дин Росстатди 2019-йисан 6 вацран вахтунда уьлкведин регионра юкьван мажибрин кьадарар гьисабна, хабар гузва идарадин пресс-къуллугъди. Малум хьайивал, виридалайни агъуз мажибар Дагъустанда къачузва — 23 агъзурни 383 манат. Санлай къачурла, Кеферпатан Кавказдин амай вири регионрани мажибрин кьадар амайбурулай агъузди я. ИкI, Чечняда ам — 24,5 агъзур манатдиз, Ингушетияда — 25 агъзурдиз, Кабардино-Балкарияда 25,1 агъзур манатдиз барабар я.
Санлай къачурла, 2019-йисан июлдин делилралди, уьлкведа юкьван мажибди 46 агъзурни 210 манат тешкилзава. Виридалайни виниз тир юкьван мажиб, малум хьайивал, Центральный федеральный округда агакьзава — 58,8 агъзур манат.
ВиртIедин мекера
2019-йисан 25-сентябрдилай 15-октябрдалди республикадин меркезда Дагъустандин виридалайни ерилу виртIедин мекера кьиле фида. РД-дин карчивилин ва инвестицийрин рекьяй Агентстводин куьмекдалди тешкилнавай и мекерада неинки лап хъсан вирт, гьакIни хуьруьн майишатдин ва халкьдин яратмишунрин маса шейэрни маса къачуз жеда.
Адан тешкилатчи Дагъустандин чIижерхъанрин союз я. Мекерадиз атай агьалийривай, хабар гузвайвал, тежрибалу чIижерхъанрихъ галаз меслятар ийиз, гьакъикъи вирт хкядай жуьреяр чириз жеда. Мярекат тухун патал “Россия — зи тарих” тарихдин паркунин патав гвай 2 гектар майдан чара авунва: Махачкъала шегьер, Имам Шамилан проспект, 31г/Ирчи Казакан куьче.
«Лезги газет»
