“Газпром межрегионгаз Махачкала” ООО-ди республикадин агьалийриз, чпин тIварцIихъ галкIурнавай (лицевой) ва ишлемишнавай газдин гьакъи гудайла гьахъ-гьисабар авун патал ишлемишдай счетар ачухдайла, компаниядин къуллугъчийри чпин везифаяр лазим къайдада тамамар тийиз ва я и кардив къайгъусузвилелди эгечIиз хьайи дуьшуьшрикай хабардар авуниз эвер гузва.
“Газпром межрегионгаз Махачкала” ООО-дин генеральный директордин общественностдихъ галаз алакъайрай советник Сапият Акаевади чаз хабар гайивал, компаниядиз ресурсралди таъминарзавай карханадин векилрилай ва абонентвилин къуллугърилай ийизвай ихьтин гзаф арзаяр къвезва. Наразивилер асул гьисабдай сифте сеферда яз счетар ачухзавай цIийи абонентриз талукь я.
«Ихьтин дуьшуьшар хьайитIа, абурукай, «Газпром межрегионгаз Махачкала» ООО-дин руководстводин тIварцIел кхьена, электронный info@dagrgk.ru почтадиз ва я идарадин адресдиз чар рекье тун тIалабзава. ЦIийи счетар ачухунин кIвалах яргъал вегьезвай, я тахьайтIа, цIийи абонентар гьисабдиз къачудайла, къуллугъдин мажбурнамаяр тамамарунин карда къайда чIуруниз рехъ гузвай ксариз талукь тир серенжемар кьабулда. Идалайни гъейри, лицевой счетар законодательстводин истемишунрал асаслу яз ачухда», — лугьузва С.Акаевади.
“Газпром межрегионгаз Махачкала” ООО-дин векилди агьалийриз гьакIни ишлемишнавай газдин гьакъи вахтунда гуниз эвер гузва. ИкI, ада рикIел хкизвайвал, газдин пул гьар вацран 10 лагьай югъ алукьдалди гун лазим я. Газдин гьакъи вахтунда тагузвай кьилдин ксарин тIварцIел, кIватI хьанвай бурж себеб яз, газдалди таъминарунин кIвалах акъвазардайдан гьакъиндай тагькимарзавай чарар рекье твада. Ихьтин чар агакьайдалай кьулухъ 20 йикъан вахтунда абонентди алай бурж вахкун тавуртIа, ам газдалди таъминардай системадикай атIудайвал я.
Хабар гузвайвал, газдин пул, суткадин гьи вахтунда хьайитIани, банкарин картайрин куьмекдалди ва комиссия галачиз гун ва я интернет-сервисрин куьмекдалди счетчикрин рекъемар агакьарун патал компаниядин www.mkala-mrg.ru сайтдикай менфят къачуз жеда. Ишлемишнавай газдин гьакъи гьакIни туьквенра ва алишверишдин центрайра гзаф кьадарра авай терминалрайни агакьариз жеда.
Компаниядин www.mkala-mrg.ru сайтда авай “Хсуси кабинет” ачухайдалай кьулухъ абонентдиз неинки вичин хсуси счетдал тамамдаказ гуьзчивал ийидай, гьакIни, кIвалин къеняй экъечI тавуна, гьихьтин хьайитIани операция тамамардай мумкинвал ачух жезва.
Муьштерийрин къулайвал патал “Зи газ” приложение мобильный телефонрани ачухдайвал туькIуьрнава. Вири и къулайвилери агьалийрин вахт кьенятзава, къейдзава компаниядин векилди.
Эхирдай къейд ийин, 2017-йисан 1-декабрдиз кьабулай ихтиярар масадав вахкунин (цессиядин) икьрардин бинедаллаз, кьилдин ксар ва карханаяр газдалди таъминарунин икьраррай истемишунар авунин ихтияр (2007-2017-йисарин вахтунда) “Газпром межрегионгаз Пятигорск” ООО-дин Дагъустандин филиалдив вахканва ва «Газпром межрегионгаз Махачкала» ООО-ди кьабулнава.
Жасмина Саидова
