Там. Жанавурдиз аквада хьи, кIекIеди илигна тарцин тандиз кIуф язава, са ван я тама гьатнавайди. Жанавурдиз адак хуькуьриз кIан жеда ва лугьуда:
— Эй вун, кIекIе, датIана кIуф ягъиз жеда хьи тарариз.
Акьван зегьмет чIугваз, жуваз са туькIвей муг — къазма кьванни туькIуьриз алакьнач валай.
— Эй жанавур, туьгьметда кIекIедини, — пехъи, инсафсуз вуна гьамиша мал-хеб, гьайванар кукIварзава. Бес вавай жуваз са туькIвей кIуртни цваз хьанвач хьи.
Фикирлу жеда жанавур ва кIекIеди дуьз лугьузвайди кьатIунда. Къведа ам сикIрен патав ва лугьуда:
— Дуст сикI, за ваз лапагар гъида, вуна заз са вижевай кIурт цуз.
Рази жеда сикI. Гъизва вагьшиди лапагар — сад, кьвед, пуд… Амма кIурт аквадач. Эхирни жанавурди кIурт мус гьазур жеда лагьана хабар кьада. Амалдар сикIре лугьуда:
— Пака нянрихъ хьиз кIурт гьазур жеда. Анжах хивекни хурудик кутадай яргъи йис, яни чIарар герек я. Алад вун атIа хуьруьз. Ана къерехда авай кIвалихъ галай сала са балкIан ава. Вуна гьадан тумни фири гваз хъша. Як герек авач.
Фида жанавур лагьай чкадиз. Авазва балкIан. Кьулухъай чинеба вегьена, кьаз кIан хьайила, къуватлу балкIанди леэнар квай кIураривди акI яна хьи, вагьшидин ахмакь келле пад хьана…
Са кьадар вахтарилай сикI а салаз мукьва хьайитIа, живедал жанавурдин сарарини кIарабри цIарцIар гузва…
«Лезги газет»
