Эхиримжи вахтара гъвечIи футбол (мини-футбол) республикада, районра машгьур хьанва. Кьурагь райондани спортдин и жуьредай гьар йисуз турнирар кьиле тухузва.   

«Лезги газетдиз» райондин администрациядин пресс-къуллугъди хабар гузвайвал, и мукьвара райондин жегьилрин арада гъвечIи футболдай акъажунар кьиле фена. Акъажунра иштиракун патал 8 хуьряй 14 командади (130 футболистди) виликамаз арзаяр ракъурнавай. Къугъуниз къимет гунин кар гьахълу ва лазим тир дережада хьун патал судьядин еринда Дербент шегьердай тежрибалу судья Сейфудин Ярагьмедоваз теклифнавай.

Турнирдин гъалибчи «Кьурагь» командадикай хьана. 2-3 лагьай чкаяр «Чкъа» ва «Махачкъала» командайри кьуна. Абур кубокралди, медалралди, грамотайралди ва пулдин пишкешралди къейдна. Хсуси карчи Рамазан Гьасанова тафаватлу хьайи футболистар патал пулдин пишкешар тешкилнавай. Пулдин пишкешар турнирдин кьилин иштиракчи Абдурагьим Рамазанован патай 4-чкадал хьайи «Ашар» командадизни, турнирдин кьилин судья Руслан Бабаевазни, Сейфудин Ярагьмедовазни гана.

«Лезги газет»