Алай йисан 9-ноябрдиз Дербентдин мэр Хизри Абакарова (цIийи къуллугъдал тайинардалди вилик) чи ватандаш машгьур спортсмен — Европадин чемпион Даурен Куругълиеваз “Дербентдин девлет (достояние)” медаль гана.
РикIел хкин: Дагъустандин Кьилин везифаяр вахтуналди тамамарзавай Сергей Меликов мукьвара Дербентдин общественностдихъ ва жегьилрихъ галаз гуьруьшмиш хьайи вахтунда ада са жерге агьалийрив, гьа гьисабдай яз сиясатдин ва жемиятдин деятелрив, культурадин хиле зегьмет чIугвазвайбурув, Дагъустанда ва Россиядин амай регионра яшамиш жезвай меценатрив, спортда машгьурвал къазанмишнавай ксарив (ва икI мад) “Дербентдин девлет” медалар ва “Дербентдин гьуьрметлу агьали” лагьай тIварар гуниз талукьарнавай шад мярекат кьиле тухвана. А вахтунда Даурен Куругълиев сборра авай, адавай и мярекатда иштиракиз хьаначир.
Медаль вахкудайла Х.Абакарова Дауренан агалкьунар, Дербент шегьер вилик тухуник кутазвай лайихлу пай, шегьердин общественно-политический уьмуьрда активнидаказ иштиракун, ватанпересвал къейдна. Дуьньядин чемпионатда гъалибвал къазанмишайтIа, Х.Абакарова адаз шегьердай квартира гунни хиве кьуна.
«Лезги газет»
