Яргъал йисарин бегьерлу зегьметдай ва кIвалахда агалкьун­рай СтIал Сулейманан райондин образованидин управленидин патав гвай Информациядинни методикадин центрадин (ИМЦ) методист, ЦIийи поселокдин СОШ-дин муаллим  Назират  Ази­мова­диз  2022-йисан 2-декабрдиз кьабулай къарардалди “Да­гъус­тан Республикадин лайихлу муаллим” лагьай гьуьрметдин тIвар ганва­.

Дагъустандин Кьил Сергей Меликова, шабагь ЦIийи йисан суварин вилик квай йикъара вахкуналди, Назират Азимовадиз ла­йихлу тIвар мубаракна, бегьерлу ва намуслу зегьметдай адаз чухсагъул лагьана, акьалтзавай несилдиз дерин чирвилер гунин­ ва ватанпересвилин руьгьдаллаз тербияламишунин карда мадни еке агалкьунар хьана кIанзавайди къейдна.

Назират Азимова, райондин гзаф агьалийриз хьиз, чазни фадлай ва мукьувай таниш я. Ам гьамиша, къайгъуйрин яцIа аваз, са гьиниз ятIани тади ийиз, вичи кIвалахзавай ИМЦ-да, образованидин управленида, школайра образованидин хилен жуьреба-жуьре мярекатар тешкилунин къайгъуйрик кваз, фестивалринни конкурсрин жюридин председатель ва я жюридин член яз аквада. Ихьтин дуьшуьшра за жува-жувак фикирни ийида: Назират муаллим виринрив гьикI агакьзава?

— КIанзавайди жуван пешедал рикI хьун я. Суткада 24 сят ава, и вахтунда гзаф крар ийиз агакьни ийида, — чи суалдиз жаваб яз, лагьана Назират Мегьамедзагьировнади.

Гьакъикъатдани, Н. Азимовадиз рикI алай пешеди шадвал, руьгьдин таъминвал гузва. Гьавиляй адахъ муаллимвилин, мето­диствилин четин, гьа са вахтунда гьуьрметлу пешейра агалкьунарни жезва.

— Назират Мегьамедзагьировна ИМЦ-дин пешекаррин ва школайрин муаллимрин куьмекчи, меслятчини я, — лугьузва центра­дин­ директор Муминат Бабахановади. — Ахьтин пешекарди чи коллективда кIвалахунал чна дамахзава.

1984-йисуз Кьасумхуьруьн 1-нумрадин юкьван школа лап хъсан къиметар аваз акьалтIарай жегьил руш гъвечIи чIавалай вичин рикIе авай мурад кьилиз акъудун патал Дагъустандин гос­университетдик экечIна. КIелни ийиз, Н. Азимовади 1987-йисан ноябрдилай 1992-йисан августдалди Кьасумхуьруьн 1-нумрадин аялрин бахчада тербиячи яз кIвалахна.

2009-йисалай Назират Мегьамедзагьировнади ЦIийи поселокдин умуми образованидин школада акьалтзавай несилдиз дидед чIа­лан ва литературадин тарсар гузва. И йисара ада чирвилер гайи гадайрикайни рушарикай алимар, хъсан пешекарар, гьабурун­ жергедай яз дидед чIалан ва литературадин муаллимар хьанва­.

2008-йисалай инихъ Н.Азимова райондин дидед чIалан ва литературадин муаллимрин — методкIватIалдин, 2016-йисалай­ образованидин организацийрин дидед чIалан ва литературадин муаллимрин Ассоциациядин регьбер я.

Тежрибалу муаллим ва методист Назират Азимовади галаз-галаз 10 йисуз СтIал Сулейманан районда дидед чIал хуьниз, чируниз ва вилик тухуниз талукьарнавай республикадин ва международный дережайрин илимдинни тежрибадин конференцияр кьиле тухвана. Ам гьакIни и конференцийрин материалар аваз методикадин пособияр чапдай акъудзавай редколлегиядин членни я.

Назират Мегьамедзагьировна 4-классар патал акъудай “Культура и традиции народов Дагестана” учебникдин рецензент, “Нау­ки юношей питают” республикадин конкурсдин жюридин председателни я.

Н.Азимовадин яргъал йисарин бегьерлу зегьмет вилик йисара “РД-дин образованидин отличник”, “РФ-дин умуми образованидин гьуьрметлу работник” лагьай тIварар, 100 агъзур манатдин­ кьа­дар­­да аваз РФ-дин Президентдин грант, РФ-дин ва РД-дин обра­зованидин ва илимдин министерствойрин, СтIал  Сулей­ма­нан райондин ва образованидин управленидин патай гьуьр­мет­дин грамотаяр гуналди къейднава.

“Дагъустан Республикадин лайихлу муаллим” лагьай гьуьр­метдин тIвар мубарак авуналди, чаз Назират Азимовадихъ мягь­кем­ сагъвал, хизанда бахтлувал, муаллимвилин ва методиствилин кIвалахра мадни еке агалкьунар хьана кIанзава.

Хазран Кьасумов