2021-йис Кьурагь райондин газетдин тарихда кьетIенди я. Октябрдин вацра “Дагъдин булах” газетдин сифте нумра акъатайдалай инихъ 90 йис хьунин юбилей къейдда. Гьа и йисара райондин дамахни, виридаз даяхни хьайи газет халкьдин гегьенш къатарихъ галаз къуьн-къуьне аваз виликди фена, адакай халкьдиз гьакъикъи куьмекчи ва ихтибарлу дуст хьана. И вакъиа себеб яз, газетдин кIвалахдик чпин л­айихлу  пай кутур ва алай вахтундани газетдихъ галаз сих алакъада аваз кIвалахза­вай Кьурагьрин 1 — нумрадин юкьван школадин дидед чIалан муаллим  ­Абдула  Семедовакай  суьгьбет ийиз кIан­зава.

А.Семедов 1954-йисуз Ахнигрин хуьре зегьметчи колхозчидин хи­занда­ дидедиз хьана. Ахнига вад йисуз сифтегьан, кьуд йисуз Кье­пIир­рин, Кьурагьрин юкьван школайра кIелна. 1971-йисуз школа куь­тягьна,  ам Дербентдин педучилищедиз гьахьна, 1975-йисуз училище акьал­тIарна. Хуьрехуьре, Ахнига, Кьуьчхуьра дидед чIалан ва сифтегьан классрин муаллим яз кIвалахна.

1976-1978-йисара Советрин Армиядин жергейра къуллугъна. Мад школада муаллим яз кIвалахна. 1978-йисуз ада “Дагъдин булах” газетдиз сифте макъала ракъурнай. Ам Хуьрехуьруьн почтальон Бабаев Османакай кхьенвай тарифдин макъала тир. Гуьгъуьнлай вичин хайи хуьре са татугай кардикай фельетон кхьейла ва ам газетда чап авурла, Абдула муаллимдиз райондин газетда корреспондент яз кIва­лахун теклифна. Гьанлай инихъ адан уьмуьр газетдихъ галаз сих алакъада ава.

Перестройкадин четин вахтара Абдула муаллимди кьве йисуз райондин радиовещанида редакторвиле кIвалахна. Радиовещание акъвазарайла, ада, Кьурагьрин юкьван школадиз хтана, вичин муаллимвилин пеше давамарна.

Информацияни печать а йисара, михьиз гъиляй вегьена, кIанел аватнавай. Халкь чIалал атана акурди, райондин администрацияди Абдула Семедоваз мад газетда кIвалахун теклифна. 2001-йисуз рай­ондин “Дагъдин булах” газет компьютерный къайдада акъудунал элячIна, адан кьилин­ редакторвилени Абдула Семедов тести­кьар­на. Газетдал акваз-акваз чан хтана.

2003-йисуз “Дагъдин булах” лезги  районрин газетрин арада лап хъсан газет яз гьисабайла, Абдула муаллим “Дагъустан Республикадин культурадин лайихлу работник” лагьай гьуьрметдин тIварцIиз лайихлу хьана.

2005-йисуз Абдула Семедов мад школадиз муаллимвилиз хъфе­на. Кьу­рагь­рин 1-нумрадин юкьван школада дидед чIалан тарсар гун давамарзава.

Алай вахтундани Абдула муаллим мукьвал-мукьвал редакциядин мугьман я, газетдин коллективдин патайни адаз еке гьуьрмет ава. Газетда­ кIвалахай йисара ам жегьил коллективдин насигьатчи ва гьар са карда куьмекчи хьана.

Халкьдин хазина тир чIал хуьнин къайгъуда авайбурукай сад Аб­дула Семедов я лагьайтIа, чун гъа­латI жедач. “Дагъдин булахдин”, “Лезги газетдин” чинрилай А.Семедован макъалаяр чаз мукьвал-мукь­вал аквазва.­

Хайи чIалал хьиз, Абдула муал­лимдин гьакI аялрални, вичин кIва­­лах­дални гзаф  рикI ала. Са шу­муд йисуз школада аялриз чирвилер ва тербия гуз зегьмет чIуг­вазвай Абдула муаллимдиз аялрин ва муаллимрин коллективдин патай еке гьуьрмет ава.

Ада тухузвай гьар са тарсуна чIал халкьдин руьгь тирди, ада миллетдин культура къалурза­вайди, гьар са инсандин уьмуьрда кье­тIен чка кьазвайди, са шумуд несилдин чIехи зегьметдин нетижа тирди аялрив школада амаз  кьатIуз тазва. Аялрин тербиядал гуьзчивал тухуз, халкьдин адетриз гьуьрмет ийиз, зегьметдиз къимет гуз, дидед чIалаз гьуьрмет ийиз чирун, гьар са тарс итижлудаказ кьиле тухун Абдула муаллимди вичин гьар йикъан­ везифаяр яз гьисабзава.

— Ватан хьиз, гьар са касдихъ  чIални хьун лазим я. Адан гуьзелвал, ширинвал, къуват уьмуьрдин гегьенш майдандиз акъатайла чир жеда. Педагогдин кIва­лахда виридалайни четинди чпин зигьиндин ва кьатIунин дережа сад хьтинди тушир аялрив гьар са тарсуникай дерин чирвилер агакьарун я. “Дагъдин булах” газетдикай ра­хайтIа, общество вилик финин вири девирра газет чи агитатор ва тешкилатчи хьайиди я. Райондин экономика, культура, образование вилик тухунин, несилриз ахлакьдин, зегьметдин, ватанпересвилин тербия гунин, милли чIал, адетар хуьнин карда газетдин коллективди еке пай кутуна. Жувни и важиблу рекье хьунилай зун пара шад я, — лугьузва А.Семедова.

Абдула муаллимдин девлет адахъ авай чирвилер ва адан гьуьр­метлу хизан я. Вичин уьмуьрдин юл­­даш Тамаматахъ галаз санал ада кьве гадани кьве руш чIехи аву­­на, уьмуьрдин шегьредал акъуд­нава. Ич тарцивай яргъаз аватдач  лугьудайвал, адан гъве­чIи руш  Гьамиятани бубадин пеше давамарзава.

Куь чан сагъ, веледрикайни рикI шад хьурай, гьуьрметлу Абдула му­аллим.

Алван  Рамазанова