Алай йисан 7-ноябрдиз Дагъустандин зурба карханайрикай сад тир “Гьажиеван тIва­рунихъ галай завод” АО-дин 85 йис тамам жезва.

Дагъустандин машинар акъудунин индустриядин сад лагьай кархана, Зегьметдин Яру Пайдахдин ордендин сагьиб “Гьажиеван тIварунихъ галай завод” АО Дагъустандин гзаф миллетрикай тир векилрин коллективди арадал гъана, виликди тухвана ва гилани и кар давам жезва. 1932-йисан 7-ноябрдиз, суварилай гуьгъуьниз, заводди сифте сеферда яз промышленный къайдада  чуьгуьн цIурурна. Гьавиляй  7-ноябрь заводдин хайи югъ яз гьисабзава.

Сифте йисара заводди карханайрин ва колхозрин тадаракар ремонт ийиз,  яшайишда­ ишлемишзавай шейэр, алатар, дагълух чкайрин  гидроэлектростанцияр патал  турби­наяр, балугъчивилин промышленностдин дизелдин тадаракрин  деталар акъудиз хьанай.

Ватандин ЧIехи дяведин йисара, заводдин   400 жегьил рабочий фронтдиз фейила, станокрихъ чкаяр абурун  папари, вахари,  рушари кьуна. Заводди женгиниз герек шейэр (снарядар, минаяр, ва икI мад) акъудиз башламишна, гьакIни фронтда ишлемишзавай  женгинин машинар ремонтзавай, оборонадин фондуниз такьатар, чими парталар, гуьлуьтар, бегьлеяр, Яру Армия патал пишкешар  кIватIзавай ва рекье твазвай.

И  йисара чIугур зегьметдай  ДАССР-дин Верховный Советдин Президиумдин Указдалди, заводдиз Советрин Союздин Игит, подводник  Мегьамед Гьажиеван тIвар гана. Ида заводдин рабочийрин руьгь мадни  гужлудаказ  хкажна,  абур зегьметдин рекье мад­ни еке гьунарлувилер къалурунал гье­вес­ламишна.  Нетижада  кархана  Государстводин Оборонадин Комитетдин гъиляй-гъилиз ­къведай Яру Пайдахдиз 9 сеферда лайихлу хьана.

Заводдин кьве къуллугъчи — Иван Горбачев ва Яков Сулейманов — Советрин Союздин Игитар хьана, 470 касдиз Советрин государстводин орденар ва медалар  гана.

Дяведилай гуьгъуьнин йисара заводди  цIийи жуьредин продукция, кьилди къачуртIа, халкьдин майишатдин  жуьреба-жуьре хилера ишлемишзавай  насосар акъудиз башламишна. Производствода агалкьунрай 1985-йисуз  карханадиз Зегьметдин Яру Пайдахдин орден гана.

Акционервилин обществодиз  элкъвейдалай кьулухъ, яни 1992-йисан 1-июлдилай, ина производстводин къурулушдиз талукь дегишвилер кьиле физ,  цIийи жуьредин технологияр ишлемишиз гатIунна.

Реформаяр башламишайла  завод, оборонадин комплексдин маса карханаяр хьиз, дерин кризисда гьатна. И кар заказар бес тахьунихъ, государстводин патай куьмек амукь тавунихъ, къунши Чечен республикада кьиле фейи вакъияр себеб яз, экономикадин рекьяй блокадада гьатунихъ, приватизациядихъ, виниз тир налогрихъ, хаммалдин, электроэнергиядин къиметар ва транспортдин тарифар хкаж хьунихъ галаз алакъалу тир. Нетижада республикадин меркезда авай  8 карханадин кIвалах тамамдаказ акъваз хьана.

Амма заводдиз машгьур подводник, Советрин Союздин Игит  Мегьамед Гьажиеван тIвар гунихъ,  ина кIвалахай рабочийрикай Со­ветрин Союздин Игитар хьунихъ, про­из­водстводин маса кIвенкIвечийрин тIвара­рихъ галаз алакъалу гьевесди карханада  арадал атанвай хъсан адетар хуьдай, намуслувилелди зегьмет чIугвадай  заводдикай  жуьре­ба-жуьре хилериз герек тир продукция  акъуд­дай, Россиядин машиностроенидин виридалайни зурба карханадиз элкъуьрдай фикирар хуьдай мумкинвал гана. Лайихлу пай и кардик лезги халкьдин векилрини кутуна.

Хив райондин Кьулан ЗахитIрин хуьряй тир  Бабаев  Нурбег  Абдурашидовича  заводда кIвалахиз 50 йис хьанва. “Гьажиеван тIварунихъ галай завод” АО-дин директоррин Советдин председатель яз, ада карханадин генеральный директор А.Я.Папалашеваз лап четин шартIара авай вахтунда  коллектив ва виниз тир пешекарвилин къуллугъчияр хуьнин карда куьмек гана.

РФ-дин “Шельфовый мяденар ишлемишиз башламишун патал 2013-2030-йисара гимияр расунин  ва техника акъудунин кIва­лах виликди тухун” госпрограммада иштира­куналди, гендиректорди ва директоррин Советдин председателди карханадин къуллугъчийрин чалишмишвилер производство базардин истемишунрихъ галаз кьадайди авунихъ элкъуьрна, конструкторар, технологар ва инженерар лагьайтIа, тадаракрин цIийи жуьредин механизмаяр ва производстводинни технический тайинвал авай шейэр акъудунал машгъул хьана. Са жерге серенжемар кьабулуни производстводин нетижалувал артухардай мумкинвал гана.

КьетIен фикир базарда кIвенкIвечи чка кьуниз, кадрийрин пешекарвал хкажуниз, алай аямдин технологияр ишлемишуниз, харжияр тIимил хьуниз гуз башламишна.

Кьве руководителдини гьисабзавайвал, вири месэлаяр кадрийри гьялзава. Нурбег Абдурашидович, асул везифаяр тамамарунилай  гъейри, 150 лезгиди  карханадин кIва­лахда иштиракунин, кадрияр хкягъунин, абур талукь чкайрал тайинарунин, цIийи жуьреда вердишарунин ва тербияламишунин месэлайрал машгъул я.

Ина и ва я маса къарар кьабулдалди ва пландик кутунвай месэлаяр тамамариз башламишдалди  вилик абур сифте  коллективда ве­ревирд авун адет хьанва. Ахпа вири къуватар асул месэлаяр кьилиз акъудунал желбзава.

Жегьил кадрийрихъ авай игьтияж винизди тирди фикирда кьуналди, 2016-йисуз  48 ученик кьабулна. Мажиб гъвечIиди, сагъламвал зайифди ва кIвалах заланди хьун себеб яз, абурукай 12 кас кIвалахдилай элячIна.  19 ученикди разрядар къачунва. Ученикриз ина вацра 5465 манат стипендия гузва, гьакIни абур пулсуздаказ яшамиш жезва ва йикъа  пуд сеферда тIуьн гузва.

Заводди рекье туналди, ДГТУ-да бюд­жет­дин бинедаллаз  6 касди кIелзава. Вуз акьалтIарайдалай кьулухъ абуру 3 йисуз заводда кIвалахун хиве кьунва. 109 студентди  производстводин ва дипломдилай виликанди тир тежриба къачунва. Заводдихъ чирвилер гудай кIвалахдиз талукь лицензияни ава, ина  токарар, фрезеровщикар, слесарар, электросварщикар, шлифовщикар ва са жерге маса пешекарар гьазурзава.

Карханадин 100 работникди ина 40 йисалай гзаф вахтунда кIвалахзава, гьа жергедай яз 20 касдихъ 50 йисалай гзаф  тежриба ава. 34 къуллугъчидин яшар 70 йисалай алатнава­. Абуру я руьгьдин кIевивал, я кIвалах­диз ба­жа­рагъвал, я коллективдин арада гьуьрмет, рикIиз чимивал, намуслувал квадарнавач ва жегьилар тербияламишунин карда иштиракзава.  Заводда агъсакъалрин советдин институт кардик ква. Агъсакъалар ина несилар  ала­къалу ийизвай гьалкъа я лагьай­тIа жеда. Абуру карханадин хъсан адетар хуьзва ва  жегьилриз и жигьетдай хъсан  чешне къалурзава. Советди гьакIни карханадин руководстводиз работникар гьикI руьгьла­миш­датIа, эдеблу  яз  гьикI тербияла­миш­да­тIа,  коллективда вири патал къулай шартIар гьикI тешкилдатIа, гьа крариз талукь меслятар гузва.

Цехра жегьилрихъ насигьатчияр, абур дуьз рекье твадай ксар галкIурзава. Абуру  са вацран вахтунда цIийиз атанвай пешекарар заводдин кIвалахдин гъавурда тун ва абу­рун кIвалах ахтармишун  лазим я. Тербия­чиди  уьмуьр патал важиблу къарар кьабулиз, политикадин жигьетдай активвал хкажиз, тамамарзавай кIвалахдин еридин ва уьмуьрдин  жигьетдай жавабдарвал жуван хи­вез къачуз чирзава, жегьил гадайрин ва рушарин  савадлувал хкажуниз фикир гузва.  Жегьилрив чирвилер ва тежриба агакьарзава, куьмек гузва, абур пешедин рекьяй  хкаж хьунал гуьзчивалзава ва икI мад. Гьа и ксари (насигьатчийри)  жегьилриз санлай  къимет гузва, яни абуру карханада кIвалахунихъ гележег авани, авачни, заводдиз абурукай хийир­ жедани, жедачни, гьадан патахъай лу­гьуз­ва. Бязи вахтара ихьтин характеристика тербиячиди гьатта 2 гьафте алатнамазди гузва. Тежрибалу тербиячийри ученикриз  чIехи несилрин зегьметдин адетар хуьн ва артмишун меслятзава, кIвалахдин нетижалувал артухарзава. Абурун теклифдалди, месела, пешекарвал къачун  разряд гуналди тестикьариз башламишнава.  И кар  зегьметчи коллектив санал кIватI хьанвай чкадал, суварин шартIара ийизва, руководстводин патай пишкешар гузва. ИкI хьайила, жегьилар чпин зегьметдин важиблувилин гъавурдани гьатзава.

Лезги тербиячияр

Мегьарамдхуьруьн райондин  Билбилхуьруьн-Къазмайрилай тир  Керимова  Салидат  Бутаевнади заводда 1982-йисалай кIва­­лахзава. Ам 18-нумрадин цехда рулевой машинрин комплектовщица я.

Сулейман-Стальский райондин Вини СтIалрилай тир  Агъабалаев  Дарвин  Ажимирзоевича карханада 1980-йисалай кIвалах­зава. Алай вахтунда ам 2-нумрадин цехда  автоматрин ва полуавтоматрин  наладчик я.

Хив райондин Тркалрин хуьряй тир Мислимова  Жамиля  Къаибовнади  заводда  35 йисалай артух девирда кIвалахзава. Алай  вахтунда  ам  2-нумрадин цехда то­карь-револьверщица я.

Жегьил пешекарар кIвалахдик тамамвилелди экечIайдалай, коллективра чпин чкаяр кьурдалай кьулухъ абур гьа­къисагъ, виниз тир агалкьунрал гъидай зегьмет чIугунин рекье твазва. И девир 2,5-3 йисуз давам жезва. Тапшуругъар кьилиз акъудун ва я артухни алаз та­мама­рун шад гьалара къейдзава, произ­вод­ст­водин кIвекIвечийриз  кьетIен фикир гузва, абур гьевесламишзава. ГьакIни ина цIийи шейэр туькIуьр­завай­бурун (изобретателрин) ва авай шейэр мадни нетижалубур ийизвайбурун (рационализаторрин)  тежриба машгьурзава, жегьилар гьялиз тахьанвай месэлайрал желбзава ва абурун теклифар фикирда кьазва. Гьаниз килигна, карханада  цIийи жуьредин­ техника теклифай ва производствода иш­ле­мишиз башламишай, заводдин механизмаяр ва алатар алай аямдин истемишунрив кьадай­вал туькIуьр хъувур гьевескарар тIимил авач.

Мегьарамдхуьруьн райондин Хуьрелрин хуьряй тир Салманов  Абдулкъафар  Батманович  (ам 1938-йисуз дидедиз хьана) заводдиз армиядин жергейрай хтайдалай кьулухъ, 1960-йисуз, термист­дин ученик яз кьабулнай. 1968-йисуз Ленинграддин гимияр расдай институт акьал­­­тIа­рай ам  Горький шегьерда авай “Красное Сормово” заводдин гьуьлерин судостроенидин кьилин эцигунардай отделдиз, цин кIаникай фидай атомный луьтквейрин (АПЛ) старший эцигунардайдан къуллугъдал рекье туна.

АПЛ-ар ВМФ-див вахкудайла, электричестводин рекьяй ва автоматикадай жавабдарвал адан хиве авай. Абдулкъафар Батмановичан иштираквал аваз АПЛ-ар Северодвинск, Полярный, Североморск ва Севастополь шегьерра вахкузвай. 1990-йисуз ам Махачкъаладиз  М.Гьа­­жиеван тIварунихъ галай заводдиз кьилин энергетикдин къуллугъдал хтана. Дагъустандин лайихлу энергетик тир ам гьукуматдин са жерге шабагьрин сагьиб я.

А.Салманова заводда электрикрин, термистрин, электромонтеррин аттестация тухузва, электричестводин рекьяй хатасузвилин группа тайинарзава, энергоресурсар ишлемишунал гуьзчивалзава, работникриз виниз тир напряжение авай электричестводин таъсирдикай хуьдай жуьре  чирзава.

Ахцегь райондин Игъиррин хуьряй тир  Эмиров Вагьид Къаферовича заводда  2004-йисалай  кIвалахзава.  2011-2016-йисара­ ада Гьажиеван тIварунихъ галай заводда тех­нический директордин везифаяр тамамарнай.

1974-1990-йисара «Авиаагрегат» заводда механизациядин ва автоматизациядин отделда конструктор, адалай кьулухъ  2003-йисалди «Даггипроводхоз» институтда конст­рук­тор­вилин отделдин начальник  яз кIвалахна.

Алай вахтунда  заводдин технологический  кIвалах (процесс)  механизация ва автоматизация авунин отделдин начальник я.  Адан везифайрик конструкторвилин документация туькIуьрун,  производстводин  кIвалах  тамамвилелди механизация ва автоматизация ийидай такьатар гьазурун ва кардик кутун акатзава. И карди производстводин  технический дережа хкажиз, гъилелди ийизвай залан зегьмет кьезилариз,  продукция  жуваз акъваззавай къимет агъузариз, адан ери хкажиз, кIвалахдин къулай шартIар тешкилиз куьмек гузва. Вагьид Къаферовича ахтар­мишзавай тадаракар сифтегьан аттестация ийизва, абур ишлемишуниз талукь  паспор­тар туькIуьрзава,  технологический тадаракар гьазурунин ва абур  производствода ишлемишиз башламишунин графикар туькIуьр­за­ва.  Ам жегьилрин насигьатчи я.

Ахцегь райондин Чеперин хуьряй тир Агъавердиев  Закир  Агъавердиевич  заводдиз  Дагъустандин педагогический институтдин физикадинни математикадин факультет акьалтIарайдалай кьулухъ, 1977-йисан 6-июндиз, атана. Сифтедай ада НОТ лабора­торияда инженер яз кIвалахна. Кьве йисалай заводдин АСУП отделдиз  инженер-прог­раммист яз хъфена. Гуьгъуьнлай ам Москвадиз  программистар гьазурдай курсариз рекье туна. Ина лап хъсандиз кIелна, заводдиз хтана. Закир Агъавердиевич кьиле авай отделди гъилелди ийизвай гзаф кIвалахар автоматламишнава: мажибрин  гьахъ-гьисаб, кадрийрин отдел, касса, асул такьатар ва тIимил къимет авай металлар гьерекатдик кутун. КIвалах кьве сменада ийизвай.

Компьютерар пайда хьайила, и крар абуралди тамамариз эгечIна. 1995-йисуз АСУП информациядин технологийрин отделдиз эл­къуьрна ва З.Агъавердиев отделдин начальникдин заместитель, 1999-йисалай отделдин начальник хьана.

Отделдин вилик компьютерар маса къачунин ва къуллугъчийриз абурал кIвалахиз чирунин месэла квай. Карханадихъ вычисли­тельный техника патал  финансрин такьатар авачир. И чIавуз Закир Агъавердиевичаз Моск­вадай  са кархана жагъана, ана ВТ завод­дин продукциядихъ дегишарунал рази хьана. Кьве йисан вахтунда завод тамамвилелди компью­терралди, принтерралди, маса тех­никадалди таъминарна.

Генеральный директорди технический къул­лугъар, яни  кьилин конструктордин отдел (ОГК) ва кьилин технологдин отдел (ОГТ)  тамамдаказ  автоматламишунин месэ­ла вилик эцигнавай.И кар патал Москвадихъ галаз алакъалу хьана ва АСКОН фирмадай тир преподавателриз, заводдин пешекарриз КОМПОС ЗД программада кIвалахиз чирдайвал карханадиз  атун теклифна. 1996-йисалай ина  Интернет ава. Продукция маса гуни­н гьакъиндай  саки вири икьрарар, гьахъ-гьисабар, кхьинар вири Интернетдай ийизва. Вири отделар  дуьньядин сетдик кутунва ва ВТ-далди таъмин я. Интернетдилай гъейри, чкадин (локальный)  сетарни ава: карханадин отделар чпин арада алакъалу авунва.  Сагъламвилин гьал себеб яз, Закир Агъавердиев 2016-йисуз начальникдин къуллугъдилай элячIна, амма  и отделда кIвалахун  давамарзава.

Хив райондин Кьулан ЗахитIрин хуьряй тир Штибегов Надир Рамазанович заводдиз 1975-йисуз атана. Алай вахтунда ам  планово-экономический отделдин начальник я.

КIвалахдин нетижалувал артухарун патал работникрин фикир зегьметда жезвай хар­жияр тIимиларунал, тадаракар, материальный ресурсар кьил-кьилеллаз ишлемишунал, гьар са касди тайин тир вахтунда гьа­зурзавай продукциядин кьадар (норма выработки) артухарунал желбнава.

Пландик кутунвай кьадар къазанжияр таъминарун, базарда заводди кьунвай чка хуьн патал  карханадин продукциядин  къиметар тайинарзава, цIийи муьштерийрихъ къекъвезва. КIвалахдин нетижалувал ва ери хъсанаруналди яшайишдин рекьяй къуллугъар тамамарун, мажибар хкажун патал пулдин такьатар кIватI жезва.

Надир Рамазановича гьисабзавайвал, кар­хана виликди финин гьерекат къенин юкъуз­ ­авайдалай са шумуд сеферда гзаф йи­гин хьун лазим я.

Куьребегов  Исамудин  Жамалудиновича “Гьажиеван тIварунихъ галай завод” АО-да кьилин бухгалтер яз  2003-йисалай кIва­лах­зава. Ада карханадин руководстводиз производстводин кьадар, къурулуш,  продукциядин жуьреяр, абурун къиметар  масадан къаришмишвал авачиз тайинариз куьмек гузва. Кьил-кьилеллаз авур кIвалах­дин нетижада карханадилай  государстводин куьмек галачиз, паталай инвесторар авачиз, хам­малдин, энергиядалди таъминарзавай шейэрин, тадаракрин къиметар ва таможнядин тарифар датIана хкаж жезвай и вахтунда производство дурумлуди ийиз, инновационный жуьреда виликди фин патал  алай аямдин механизмаяр, тадаракар маса къачуз, заводдин кIвалах ва рабочийрин яшайишдин шартIар  хъсанариз алакьнава.

КIвалахдин рекьяй юлдашрин кефи ха­дач­, гьа са вахтунда вичин гафунал кIеви­вал­да, истемишунарда. Коллективда Исамудин Жамалудиновичаз  лайихлудаказ гьуьр­- метзава. 2012-йисуз адаз РД-дин лайихлу экономист лагьай тIвар гана.

Ада заводдиз  виниз тир къазанжияр гъидай шейэр  — элкъуьриз жедай затворар, гьуьлуьн насосар, рулевой машинар — акъудуниз кьетIен фикир гун теклифзава.

Завод эцигиз гъиле кьур йисара (алатай асирдин 30-йисар) ам алай мулк шегьердин къерех, нацIри кьунвай, уьленар авай чка тир. Гила Гьажиеван завод алай чка  Махачкъала шегьердин юкь я лагьайтIа ягъалмиш жедач. Гьаниз килигна, республикадин меркезда экологиядин  жигьетдай хатасузвал таъминарунин, хаталу производст­во тIими­ла­­рунин макьсаддалди  Каспийск мо­но­ше­гьер­дин инвестицийрин “Уйташ” майдандал литейный цех эцигнава. Аниз фидай рехъни, чиргъ вегьена, туькIуьрнава, эл­къуьр­на жугъун янава, лазим бязи дараматар эцигнава. И чка электроэнергиядалди, газдалди таъминарунин, къир цанвай рехъ туь­кIуьрунин кIвалахар “Дагъустан Республикадин моношегьеррин рекьяй дирекция” ГКУ-ди алай йисан эхирдалди куьтягьун лазим я.

“Уйташ” майдандал элячIуни Гьажиеван тIварунихъ галай заводдиз чилелай, эменни­дилай гузвай налогрин кьадар тIимилар­дай, “Техникадин рекьяй цIийивилер тун ва  заготовительный производство гегьеншарун” проектдин сергьятра аваз, базарда гьуьжетиз жедай, илимдал бинеламиш тир, технологичный шейэр акъуддай, 200-далай артух кIва­лахдин цIийи чкаяр таъминардай  ва республикадин  бюджетдиз къведай финансар гзафардай мумкинвал гуда.

“Гьажиеван тIварунихъ галай завод” АО-дин цехар Каспийск шегьердиз акъуду­нин кIвалахрин кьиле карханадин генеральный директор  Папалашов  Абдулвагьаб  Яхъяевич, капитальный эцигунрин рекьяй  генеральный директордин заместитель Штибегов  Энвер Мигьажудинович (Хив райондин ЗахитIрин хуьряй я), ОКС-дин начальник  Ба­баев  Рамазан  Ярагьмедович  (Сулейман-Стальский райондин Курхуьряй я) акъвазнава­.

Инвестицийрин “Уйташ” майдандал завод эцигунин кIвалахрин генеральный пудратчи “МЕГА-строй” ООО  ва адан директор  Велегаев  Гуснедин  Гьажиагъаевич  Докъузпара райондин Мискискарин хуьряй я.

Гьажиеван тIварунихъ галай заводда гьакI­­­ни отделрин начальникар яз кIвалах­за­ва: ахцегьви  Шагьмарданов  Абдул  Агьмедовича  (административно-майишатчивилин), игъирви  Эмиров  Вагьид  Къафаровича  (механизациядин ва автоматизациядин), ахцегьви Керимов Абдулманаф Абдулфатагьовича (1-отделдин), Мегьарамдхуьруьн райондин Муьгъверганрин хуьруьн агьали Эмиралиев  Руслан  Эмиралиевича  (информациядин технологийрин), Дербент райондин Белиж по­селокдай тир Абдуллаев  Агъакерим  Абдулкеримовича  (зегьмет хуьнин ва ха­тасузвилин техникадин). Абурун намуслу  зегьметдин нетижада карханадин коллек­тив­ди вилик эцигнавай месэлаяр кьилизни акъуд­да.

2016-йисан 1-декабрдиз  Федеральный Собранидиз рекье тур Чарче РФ-дин Президент Владимир Путина къейд авурвал, эконо­микадин, сиясатдин ва яшайишдин важиблу месэлайрихъ галаз сад хьиз,  уьлкведин оборонадинни промышленностдин карханаяр дериндай цIийи хъувунин, абуру акъудзавай продукциядин пудан са паюнилай тIимил тушиз  алай аямдин, базарда гьуьжетиз жедай гражданвилин шейэр жедайвал авунин игьтияж ава.

Масанал хъфинин ва производстводин конверсиядин, яни оборонадин продукциядилай гражданвилиндал элячIунин четин девирда заводда ЖКХ-дин игьтияжар патал лазим  арматура, чими  ва къайи ятарин турбайрин 6 жуьредин задвижкаяр акъудунин кIва­лах кардик кутазва. НафтIадин ва газдин про­мыш­ленность патал трубопроводрин мах­сус жуьреда туькIуьрнавай арматура акъуд­зава.

Элкъуьриз жедай затворар, гимийрал эцигдай насосар ва  рулевой машинар серийный къайдада акъудзава.

Ракьун шейэр термодиффузиядин жуьреда цинкламишунин цIийи  технология ишлемишиз башламишнава.

Фермерар, хуьруьн майишатдин кооперативар  ва майишатар  целди таъминарун патал трактордихъ галкIурдай ва винелай яд гудай тадарак туькIуьрнава. Хуьруьн майишатдин министерстводихъ галаз санал и тадаракдин ахтармишунар кьиле тухвана, адахъ  гележег авайди тестикьарна. Карханадивай техил­ регъведай, тарариз дарманар ядай, къаришмаяр какадардай ва хуьруьн майишатда лазим жезвай  са жерге маса тадаракар, алатар акъудиз жезва.

ЦIурурнавай чуьгуьндикай заводди общественный чкаяр, бахчаяр патал мягькем куьсруьяр, канализациядин люкар, багъларинни,  паркарин фонарар, куьчедин светильникар, хейлин маса шейэр  гьазурзава.

Эхиримжи 5 йисан вахтунда акъудзавай продукциядин кьадар 215 миллион манатдилай 553 миллиондив агакьдалди гзаф хьанва. Юкьван мажиб  2012-йисуз 9766 манат тиртIа, шаз 24051 манатдив агакьнава. Алатай йисуз  налогар яз 137,5 миллион манат ганва, государстводин патай лагьайтIа,  гьич са кепекни атанвач.

Алай вахтунда заводди  пешекарвал авай рабочийриз кьвед ва пуд лагьай пешейрай чирвилер гунин, чилин деринра  ишлемишдай насосрин ери  хъсанарунин,  акъудзавай кьадар гзафарунин, гьулдан цIурурдай цIийи къайдаяр ишлемишиз башламишунин ва карханадин техника цIийи хъувунин  месэлаяр вилик эцигнава.

Мегьамед Юнусов