Чи ватанэгьлияр — гьар сана
Дуьньяда коронавирусдин тIугъвал чкIайдалай инихъ духтуррин хиве мадни гзаф жавабдарвал гьатнава. Къе инсаниятдин сагъламвал гьабурун пешекарвилинни гьакъисагъвилин кIвалахдилай, ял ядай йикъарни рикIелай алудна, галатун тийижиз чIугвазвай зегьметдилай аслу я. Духтур, медицинадин илимрин кандидат Загьир Хидирович Агъамова Москвада гьа ихьтин четин шартIара кIвалахзава.
Ам 1979-йисан 21-июлдиз Махачкъалада (бубайрин ватан Мегьарамдхуьруьн райондин Хъартас-Къазмаяр я) дидедиз хьана. 1996-2002-йисара ада “сагъарунин кар” пешедай ДГМА-да кIелна. 2002-2004-йисара Астрахандин гьукуматдин медицинадин академияда “урология” пешедай клиникадин ординатурада чирвилер артухарна.
Анжах тамам чирвилер къачурдалай кьулухъ жегьил духтурди вичин зегьметдин рехъ башламишна. ИкI, 2004-йисуз Загьир Агъамов Москвадин 173-нумрадин поликлиникада духтур-уролог яз кIвалахал акъвазна. 2012-йисалай инихъ 115-нумрадин шегьердин поликлиникада кIвалах давамарзава.
2008-2011-йисара З.Агъамова жемиятдин сагъламвилин РАМН-дин (Россиядин медицинадин илимрин академия) Милли НИИ-дин аспирантурада кIелна. Ватанэгьлидин дерин чирвилериз, алакьунриз аспирантура куьтягьайдалай кьулухъ лайихлу къиметни гана: 2011-йисуз ам гьа институтдин илимдин къуллугъчивиле кьабулна.
Илимдинни тежрибадин кIвалахар санал кьилиз акъудунин нетижаярни бегьерлубур хьана. 2012-йисуз ада РАМН-дин академик, профессор, медицинадин илимрин доктор О.П.Щепинан регьбервилик кваз агалкьунралди “Социально-гигиенические и организационные аспекты совершенствования диспансеризации населения в городской поликлинике города Москвы” важиблу темадай медицинадин илимрин кандидатвилин диссертация хвена.
Институтдин илимдин къуллугъчи яз, Загьир Хидировича илимдинни ахтармишунрин кIвалахра иштиракзава, мукьвал-мукьвал региондин ва уьлкведин дережайра кьиле тухузвай илимдин конференцийрал медицинадин рекьяй аямдин важиблу месэлайрай докладар кIелзава.
Загьир Агъамов къачунвай чирвилерал, дережайрал рази яз ацукьнавач. Илимдин кукIушриз хкаж хьунин ашкъини, алакьунарни, мумкинвилерни авай жегьил алимди алай вахтунда медицинадин илимрин докторвилин диссертациядин винел кIвалахзава. Темани хкянава — “Научное обоснование совершенствования первичной медико-санитарной помощи в Российской Федерации”.
2013-йисуз адаз “Государственное учреждение “Ведомственная охрана Министерства финансов Российской Федерации” ФКУ-дин регьберди и идарадин медпункт арадал гъунин ва гележегда адан кьиле акъвазунин теклиф гана. А чIавалай инихъ З.Агъамова вичин везифаяр гьакъисагъвилелди тамамарзава.
2013-2014-йисара ада РФ-дин президентдин патав гвай халкьдин майишатдин ва гьукуматдин къуллугъдин Россиядин академияда “Здравоохраненида менеджмент” пешедайни чирвилер къачуна. 2017-йисуз ада вичин кIвалахдин тежрибада ишлемишай илимдин ахтармишунрал бинелу яз, Москвадин поликлиникада медицинадин куьмек агакьарунин рекьяй метлеблу теклифар гана. И кIвалах 2017-йисуз медицинадин хиляй Москвадин областдин гьукуматдин премия гун патални къалурнай. Жегьил алимдин илимдинни ахтармишунрин кIвалахдикай 2018-йисуз “Исследования и практика в медицине” илимдин журналдиз макъала акъатна.
2017-йисалай Москвадин здравоохраненидин департаментди пешекар духтурар винел акъудунин мураддалди “Москвадин духтур” тIвар алай проект кьилиз акъудзава. Лайихлу алимри, вини дережадин пешекарри гайи къиметдин нетижада 2018-йисуз Загьир Агъамовни “Москвадин духтур” тIварцIиз лайихлу хьана.
Вичин кIвалахдал, илимдал кьару ватанэгьлиди урологиядин жигьетдай духтуррин пешекарвал хкаждай жуьреба-жуьре проектар арадал гъана. Абурукай «Экспериментальная и клиническая урология» илимдин журналдиз макъалани акъатна. 2018-2020-йисара ада «Управление и экономика здравоохранения» программадай экономикадин кьилин мектебдин магистратурада чирвилер къачуна.
Коронавирусдин тIугъвалдин лепе пайда хьайи муддатда З.Агъамова духтурвилин рекье къимет эцигиз тежер зегьмет чIугуна. Уьлкведин меркездин 115-нумрадин поликлиникада Загьир духтурди коронавирус акатнавай азарлуяр авай “яру зонада” кIвалахна, хейлинбур сагъ-саламат хъувуник вичин пайни кутуна.
КьетIен тежриба, чирвилер, вердишвилер авай духтурди алай йисуз “Сагълам хуьр” тIвар алай яшайишдин проект туькIуьрна ва Мегьарамдхуьруьн Хъартас-Къазмайрин хуьруьн медпунктуна кьилизни акъудна. Проектдин сергьятра аваз Москвадин пешекар духтуррин дестеди хуьруьн агьалийрин сагъламвал ахтармишна. Вини дережадин технологиядин тадаракралди сагъар хъувунин чарасузвал авай ватанэгьлияр патал квотайрин сергьятра аваз Москвадин кьилин медидарайриз фидай мумкинвал тешкилна. Гьакъикъатдани, Загьир духтурди Дагъустандай 50-далайни гзаф азарлуйриз гьар йисуз куьмекар гузва. Гьавиляй ам вирибуруз сейли я.
З.Агъамов илимдин 15 кIвалахдин автор, Россиядин урологрин ва онкоурологрин обществойрин член я. Жегьил алимдин хизанда пуд аялдиз тербия гузва. Къуй адахъ кIвалахда, илимда мадни еке агалкьунар хьурай!
К.Ферзалиев
