Алай йисан ноябрдин вацра Москвада эдебиятдин эсерар Урусатдин халкьарин чIаларай таржумаяр авуниз талукьарна “Чи сесерин ван хьухь, Урусат” лишандик кваз кьиле фейи I конкурсдин нетижаяр кьуна. Шад жедай кар ам я хьи, конкурсда “Шииратдин таржумаяр” номинациядай 1-чкадиз лезгийрин машгьур шаир, алим Фейзудин Нагъиеван шиирар лезги чIалай урус чIалаз элкъуьрай Михаил Михайлович Крылов лайихлу хьана.
Къейд ийин хьи, и конкурсда Космина Исрапиловадин эсерар яхул чIалай таржума авур Татьяна Дробжевади 3-чка кьуна. Мадни конкурсдин дипломдиз Сувайнат Куьребеговадин шиирар табасаран чIалай урус чIалаз элкъуьрай Ирина Ворох лайихлу хьана.
Конкурсдин гъалибчийрив Урусатдин писателрин Союздин патай дипломар вахкана. Абурун таржумаяр лагьайтIа, Урусатдин писателрин Союздин сайтда, “Молодая гвардия”, “День литературы” ва “Мир перевода” журналра чапда.
Конкурсдин оргкомитетдин членри къейд авурвал, уьлкведин регионра эдебиятдин эсерар жуьреба-жуьре чIалариз таржума авунин кIвалах зайиф гьалда ава. Иллаки гьикаятдин эсерар лап тIимил таржума ийизва. Конкурсдиз гьикаятдин гъвечIи жанрайра аваз кхьенвай са эсерни ракъурнавачир. Таржумаяр авунин кIвалах Урусатдин писателрин Союздин Астраханда авай отделениди виридалайни хъсандиз кьилиз акъудзава.
Чна Фейзудин Нагъиеваз ва адан шиирар урус чIалаз элкъуьрай Михаил Крыловаз уьлкведин дережеда аваз кьиле фейи эдебиятдин конкурсда 1-чка кьун мубаракзава. Чпихъ мадни еке агалкьунар хьурай!
Агьмед Магьмудов
