Милли “Культура” проектдин сергьятра аваз, и йикъара СтIал Сулейманан райондин Эминхуьруьн ктабханадикай “Лучшая библиотека, находящаяся на территории сельского поселения Республики Дагестан” номинациядай 100 агъзур манатдин кьадарда авай грантдин гъалибчи хьана.
Къейд авун лазим я хьи, Эминхуьруьн ктабхана 1968-йисалай кардик ква. Алай вахтунда ана 7600 ктаб, жуьреба-жуьре газетар, журналар, брошюраяр ва гьакIни интернет ишлемишдай мумкинвални ава.
Ктабханадин заведующий Алла Буржалиевади къейдзавайвал, ктабар кIелзавайбурун кьадар 890-дав агакьзава. Идалайни гъейри, ктабханада кIелзавайбурун конференцияр, машгьур ксарихъ, ветеранрихъ, шаиррихъ галаз гуьруьшар, гьар жуьредин маса мярекатар кьиле тухузва, райондин ктабханайрин кьилин къурулушда тухузвай саки вири мярекатра активвилелди иштиракзава.
Грантдин такьатрин гьисабдай ктабхана техникадин рекьяй герек тир тадаракралди таъминарда ва мебель дегишаруниз харжда.
Лугьун лазим я, мукьвара хуьруьн ктабхана ремонт авунвай маса дараматдиз акъуддайвал я.
Лена Саидова
