1-июндиз Сулейман-Стальский районда Госдумадин депутат, образованидин ва илимдин рекьяй Комитетдин член Гьажимет Сафаралиевахъ галаз активдин гуьруьш кьиле фена, — хабар гузва «Сулейман-Стальский район» МР-дин администрациядин пресс-къуллугъди.
Мярекат ачухай райондин Кьил Нариман Абдулмуталибова къейд авурвал, Гьажимет Сафаралиев 2003-йисалай РФ-дин Госдумада Дагъустандин векил я. Гь.Сафаралиев чи халкьдин ялавлу векилрикай сад я, 15 йис я ам Госдумадин депутат яз. Образованидинни илимдин рекьяй РФ-дин Госдумадин Комитетдин векил яз, ада и хилени чlехи кlвалах ийизва.
Гуьруьшдал райондин Кьил Нариман Абдулмуталибова райондихъ яшайишдинни экономикадин рекьяй хьанвай агалкьунрикайни къейдна. Гьа са вахтунда ада газламишунин, мектебар ва аялрин бахчаяр эцигунин, улакьрин рекьер цlийи хъувунин, спорт вилик тухунин жигьетдай гьялиз тахьанвай месэлаяр амайдакайни лагьана.
Образованидин хилез талукь месэлайрин жигьетдай депутатдиз жуьреба-жуьре хуьрерин мектебрин директорри, муаллимри, аялрин бахчайрин заведующийри чпин теклифар авуна; абуру акьалтзавай бязи четинвилерикайни лагьана. Кьилди къачуртlа, абуру мектебрин дараматар чlуру гьалда авайдакай, анра спортдин тадаракар бес тежезвайдакай, материалринни техникадин такьатар зайиф тирдакай, ктабралди бес кьадарда таъмин туширвиликай ихтилатна. Гуьруьшдал агьалияр патал важиблуди тир хуьруьн майишатдин месэлайрикайни ихтилат кватна.
Гьажимет Сафаралиева гуьруьшдин иштиракчийриз малумарайвал, къарагъарай вири месэлаяр сад-садаз ухшарбур я. Депутатди Кьасумхуьруьн 2-нумрадин ва Алкьвадар хуьруьн мектебрин дараматар эцигунин месэла вичин кьилдин гуьзчивилик кутадайди лагьана.
Гьажимет Сафаралиев «РФ-дин образованидин гьакъиндай» Федеральный къанундик хайи чlалар чирунин жигьетдай дегишвилер кухтунин месэладал кьилди акъвазна. И месэладин патахъай Сулейман-Стальский райондин муаллимри депутатдиз идалай вилик чарни кхьенвайадан гафаралди, хайи чlалар гьикl авайтlа, гьакl амукьда, гьикl чирзавайтlа, инлай кьулухъни гьакl чирда. Кухтазвай дегишвилерикай рахайтlа, чна «РФ-дин составда республикадин государстводин чlал» лагьай фикир какадарзава», — къейдна депутатди.
Гуьруьшдин эхирдай Нариман Абдулмуталибова Гьажимет Сафаралиеваз чухсагъул малумарна ва гележегдани санал кlвалахуник умуд кутунин гафар лагьана.
«Лезги газет»
