Газет кIелзавайбурун фикирдиз!
Чна идалай виликни хабар гайивал, 2023-йисалай государстводи штатдик квачир мухбирриз бюджетдин такьатрикай гонорар гун патал пул чара ийизмач. Бюджетдай пул анжах штатдик квай къуллугъчияр патал ахъайзава. И кар фикирда кьуна, редколлегияди штатдик квачир мухбирриз гонорар редакциядин бюджетдинбур тушир (газет подписка авунин нетижада редакциядиз амукьзавай) пулдин такьатрин гьисабдай гудай къарар кьабулнава.
“Лезги газетдин” редакциядихъ галаз чкайрилай алакъа хуьзвай мухбирри чпин материалрин эхирра и кьве жуьредикай сад къалурун шартI я: “Гонорар редакциядин фондуниз гузва”; “И материал (макъала, шиир, кроссворд ва мсб.) гонорар къачун патал редакцияди автордихъ галаз кутIундай икьрардик кутун тIалабзава”.
Гьар йисан эхирра, 1-ноябрдилай 1-декабрдалди, редакцияди авторрихъ галаз икьрарар кутIунда. И кар авун патал гонорар къачуз кIанзавай штатдик квачир мухбирри 1-ноябрдалди редакциядив и документар агакьарун лазим я: кьилин редактордин тIварцIел арза, паспортдин, ИНН-дин, СНИЛС-дин копияр, картадин банкдай къачузвай реквизитар. Арзада авторди вичин гьи материал гьи нумрада чапнаватIа къалурун шартI я.
И документрин бинедаллаз йисан эхирдай гьар са мухбирдихъ галаз редакцияди кьилдин икьрар кутIунда ва гонорар банкдин картадиз рахкурда. Авторриз гонорар нагъд пул яз мад хгудач. Къейд ийин хьи, цIийи йисуз алатай йисарин гонорар вахчуз жедач. Гьар йисан гонорар гьа йисан эхирдай гуда.
Ихьтин къайда неинки са “Лезги газетдин”, гьакIни милли чIаларал акъатзавай амай газетрин редакцийрани кардик акатнава. Мадни башкъа, цIийи къанунрал асаслу яз, алай вахтунда государстводин хейлин идарайра пулдин такьатрихъ галаз алакъалу вири гьерекатар анжах электронный къайдада кьиле тухузва.
Мадни са кардикай хабар гуз кIанзава. Чи редакциядихъ галаз алакъа хуьзвай штатдик квачир мухбиррин арада пенсияда авайбур аватIа, абуруз чир хьун герек я: эгер куь картадиз гонорар хтайтIа, куьн “работающий пенсионер” категориядик акатда ва, къанунрал асаслу яз, куь пенсиядин кьадар тIимил жеда.
«Лезги газет»
