Играми ватанэгьлияр!
Августдин эвел кьилерилай гатIунна Махачкъалада, имам аш-Шафиидин тIварунихъ галай мискIинда, Къуръан ва Пайгъамбардин (къуй Аллагьдин патай салават ва саламар хьурай вичиз) уьмуьрдин рехъ чирунай диндин тарсар кьиле тухудайвал я. Къейд ийин хьи, тарсар лезги чIалал тешкилда, гьавиляй аниз анжах лезгийривай къвез жеда. И делилди шегьердин чкада авай чи ватанэгьлийриз диндихъ галаз санал хайи чIалайни чирвилер къачудай мумкинвал гуда.
Тарсар мискIиндин имам, алим Тажидин гьажи Къазибегова тухуда. Чебни гьар гьафтеда, саласа ва жуьмя йикъара, гъетрен кпIунилай (вечерний) кьулухъ месин (ночной) кпIуналди кьиле фидайвал я.
Имам аш-Шафиидин тIварунихъ галай мискIин Махачкъалада, Дагъустандин хуьруьн майишатдин ва недай-хъвадай суьрсетдин министерстводин дараматдин кьулухъ (микрорайон “Ветеран”), Хушетдиз физвай рекьин къерехда ава.
Тарсариз къведай ният авайбурувай, суалар пайда хьайитIа, телефондин 8-928-872-34-31 нумрадиз зенг ийиз жеда.
