Мукьвара дуьньядин чемпионатдин гимишдин сагьиб Радикан Къулиев тебрикуниз талукьарнавай мярекат Хасавюрт райондин Къурушрин хуьре кьиле фена. Аниз Дербент, Махачкъала, Къизилюрт, Хасавюрт, Къизляр шегьерра яшамиш жезвай хейлин ватанэгьлияр хтанвай.
Мярекат хуьруьн администрациядин кьил Рафик Юсупова ачухна:
— Са шакни алачиз, Радик Къулиевалай чи акьалтзавай несилри чешне къачуда ва ам себеб яз хейлин жегьилар спортдал машгъул жеда. Къуй, Радик, вахъ гележегда мадни еке агалкьунар хьурай, вуна мад ва мад къазанмишдай гъалибвилери чун шадаррай, — лагьана хуьруьн администрациядин кьили ва гъалибчи руьгьламишунин лишан яз адав пулдин премия вахкана. ГьакIни Р.Юсупова администрациядин патай Радик Къулиеваз кIвал эцигдай чил чара авунвайдакайни хабар гана.
Мярекат Дагъустан Республикадин лайихлу муаллим, вичихъ международный дережадин жуьреба-жуьре турнирар, чемпионатар тухунин карда еке тежриба авай спортдин комментатор Насир Алхасова кьиле тухвана. Ада Къурушрин тарихдизни алай аямдиз талукь яз гьазурнавай маналу доклад кIелна.
Гуьгъуьнлай микрофондихъ хуьруьн имам Азим гьажи Панагьоваз теклифна.
— Спортдин жуьреяр гзаф аватIани, лугьун лазим я, азаддиз кьуршахар кьунин жуьре кьетIенди я, вучиз лагьайтIа спортдин и жуьредал машгъул хьун Мугьаммад Пайгъамбардин сунна я.
Гьуьрметлу Радик стха, къуй вун чешне яз кьуна, чи хуьруьн жегьилар анжах хъсан, жемятдиз, хуьруьз хийир хкатдай крарал машгъул хьурай. Къуй Сад Аллагьди чаз вун нубатдин сеферда хурудал къизилдин медалар алаз къаршиламишдай мумкинвал гурай, — лагьана, имамди мярекатдин себебкардив, савкьат яз, Пак Кьуръан ва Мугьамад гьажи Хидирован тIварунихъ галай фондунинни «Къурушрин сес» газетдин редакциядин патай саналди тир къиметлу пишкеш вахкана.
Дагъустандин жегьилрин лайихлу насигьатчи, муаллим Несруллагь Эскендарова Радик Къулиеван тIварцIихъ алхишдин келимаяр лагьайдалай кьулухъ адаз хъсан савкьатни багъишна.
Дагъустандин лайихлу муаллим Аслан Аскандарова мярекатдин иштиракчияр Радик Къулиеван биографиядихъ галаз мукьувай танишарна ва гъалибчидиз вердишвилер гузвай чи баркаллу хуьруьнви, Беларусь Республикадин лайихлу тренер Малик Аскандарован лайихлувилерикай къейдна. Ада, Жавид Гьамзатов, Радик Къулиев ва са жерге маса пагьливанар гьазурунай, Малик Индижаевичаз вири хуьруьнвийрин патай сагърай лагьана. Вичин рахунрин эхирдай Аслан муаллимди Радиказ адан агалкьунрихъ рикI кузвай хуьруьнвийрин патай пулдин премия гана.
Райондин администрациядин патай Радиказ тебрикиз спортдин комитетдин председатель Агьмед Исакьов атанвай. Ада «Хасавюрт район» МО-дин кьил Жамбулат Салавован къул алаз Радиканни адан тренер Малик Индижаевичан тIварцIел ракъурнавай чухсагъулдин чарар кIелна ва адав къиметлу пишкеш вахкана. Тебрикдин келимаяр Р. Къулиеван тIварцIихъ Хасавюрт шегьердин администрациядай атанвай векилдини лагьана.
Мярекатдал хуьруьн агъсакъалрин Советдин председатель Вердихан Къулиева, «Къурушрин сес» газетдин кьилин редактордин заместитель Гьажи Къазиева спортсмендин тIварцIихъ хуш келимаяр лагьана ва гележегда адахъ мадни еке агалкьунар хьун алхишна. Шаир ва муаллим Акиф Лазимова гъалибчидиз бахшнавай вичин шиир кIелна. Мектебда кIелзавай аялри Радик Къулиеваз бахшна кIелай бендер мярекатдин иштиракчийри гурлу капар ягъуналди кьабулна.
Мярекатдин эхирдай вири ЦIийи Къурушдал Ж. Гьамзатован тIварунихъ спортзал хкажзавай чкадал фена ва Олимпиададин буьруьнждин сагьиб Жавида спортзалдин сифте къван эцигна.
Гуьгъуьнлай абур вири тIямлу хуьрекрикай дад акваз «Яры Дагъ» тIвар алай шад мярекатар къурмишдай залдиз рекье гьатна.
Гьажи Къазиев
