Къадим Дербентдин иллаки фадлай инихъ авай (тарихдин) паюна яшайишдин кIвалерин, мектебрин, жуьреба-жуьре идарайрин цларал баркаллу ксарин, халкьдин игит рухвайрин гьуьрметдай эцигнавай мармардин кьулар (мемориальный доскаяр) гьалтда.
Мукьвара ихьтин мармардин кьул шегьердин Г.Гьасанован тIварунихъ галай куьчеда Ватандин ЧIехи дяведин активный иштиракчи, кьегьал лезги хва Мустафа Агъаевич Набиеван гьуьрметдай ам яшамиш хьайи кIвалин цлални эцигна.
Ам шад гьалара ачухунин мярекатда шегьердин кьил Малик Баглиева, Дербент, Дагъустандин Огни шегьеррин ва Дербент райондин военком Адил Къулиева, игитдин руш Галина Мустафаевнади, “Дагюгстрой” ОАО-дин генеральный директор Гьажи Жабраилова, шегьердин Общественный палатадин член Нариман Рамазанова, ветерандин мукьва-кьилияр тир Альбина Рагьматуллаевади, Муьгьуьдин Демирбегова ва шегьердин общественностдин векилри иштиракна. Митингдал рахайбуру Ватандин вилик Мустафа Набиеван лайихлувилер къейдна, женгера адан баркаллу рехъ къенин ва гележегдин несилар патал чешне тирдакай лагьана.
М.Баглиева вичин рахунра малумарайвал, Дербентда тамам са микрорайондиз “Гъалибвал” тIвар ганва ва анин хейлин куьчеяр анра яшамиш хьайи машгьур ксарин тIварарихъ янава.
Вичин ери-бине Агъа Макьарин хуьр тир Мустафа Набиев Дагъустанда машгьур ксарикай сад я. Ватандин ЧIехи дяведин женгера ва дяве куьтягь хьайидалай кьулухъ ислягъ зегьметда адан игитвилерикай гзаф кхьенва.
Ам Гитлеран чапхунчийри чи Ватандал вегьей кьвед лагьай юкъуз вичин хайи макан тир Кьурагь райондин Агъа Макьарин хуьряй гуьгьуьллудаказ дяведиз фена. 40-армиядин жергейра аваз ада вичин сифтегьан женг Курскдин фронтда башламишна. Гуьгъуьнлай викIегь командирди Киев, Житомир, Новгород, Волынск, Луцк ва хейлин маса шегьерарни хуьрер душмандикай азад авунин женгера еке кьегьалвилер къалуруналди иштиракна.
Дяве куьтягь хьайила, Мустафа Набиев хур женгинин наградайрив ацIанваз хуьруьз хтана. Адан лайихлувилер къейднавай гзафбурукай анжах са шумуд шабагь: Яру Пайдахдин, Александр Невскийдин, Яру Гъед (кьве орден), Ватандин дяведин вири пуд дережайрин орденар, “Женгера лайихлувилерай” медаль ва масабур.
Ислягь девирда Мустафа Набиева Кьурагь, Табасаран районрин, Дербент шегьердин военкомвиле ва гзаф кьадар маса идарайрани карханайра вичин алакьунар къалурна, халкьдин патай гьуьрмет, авторитет къазанмишна.
Нариман Къарибов
