Гьар йисан сифте кьиляй адет хьанвайвал, 13-январдиз къейдза­вай Россиядин Печатдин суварихъ галаз алакъалу яз, и йикъара «Лезги газетдин» редакцияди журналистар, мухбирар, ктабар акъуд­завайбур патал малумарнавай конкурсрин нетижаяр кьуна, гъалибчияр хкяна. Мубаракрай!

 ГЬАЖИБЕГ ГЬАЖИБЕГОВАН  пре­мия — 10 000 манат. «Лезги газетдин» сад лагьай редактор, журналист, драматург, критик, литературовед, лезги ва табасаран чIаларин алфавит туькIуьрай алим, Дагъустанда педагогикадин илимрин сад лагьай кандидат, Дагъустандин илимдин ва культурадин къизилдин фондуна гьатнавай яратмишунрин ирс тунвай Гьажибег Агьмедханович Гьажибегован (1902-1941) тIварунихъ галай и премия  милли журналистика, публицистика, литература, илим вилик тухунин кардик лайихлу пай кутур ксариз гузва.

2025-йисуз авур кIвалахрин нетижада и премиядиз «Лезги газетдин» кьилин редактордин заместитель, журналист, мектебра кIелзавай аялар патал ктабрин авторрикай ва, лезги чIал хуьнихъ элкъуьрна, редакцияди кьиле тухузвай са жерге мярекатар (конкурсар, олимпиадаяр, диктантар) тешкилунин кардин активлу иштиракчийрикай сад Куругъли ФЕРЗАЛИЕВ лайихлу хьанва.

2025-йисуз ада юкьван ва чIехи классра кIелзавайбурухъ лезги чIа­лайни эдебиятдай авай чирвилер ахтармишунин, абур конкурсриз, олимпиадайриз ва имтигьанриз гьазурунин рекье куьмек жедай «Тапшуругърин кIватIал №2», мектебда кIелдай яшдив агакь тавунвай ва сифтегьан классра кIелзавай аялриз талукь «Аялар патал кроссвордар ва маса машгъулатар» ктабар акъудна.

ГьакIни ам шаз сифте яз акъатай «Лезги чIаланни урус чIалан шикилар галай гафаргандин», жуьреба-жуьре йисара акъатай лезги чIалаз талукь хейлин ктабрин, гьа жергедай яз 2, 5, 7-классар патал кIелунин пособийрин авторрикай сад я.

МЕГЬАМЕД ГЬАЖИЕВАН  премия — 5000 манат. Лезги халкьдин  маш­гьур лингвист, филологиядин илимрин доктор, кавказовед, РАН-дин ДНЦ-дин ИЯЛИ-дин бине кутур­ алимрикай сад, лезги чIал ахтарми­шунин нетижа яз, чи халкь патал вичин метлеб садрани квахь тийидай  ва вичиз тешпигьди авачир урус чIаланни  лезги чIалан таржумадинни баянрин  зурба  словарь (35 агъзур гафуниз баянар ганва)  гьазурай  Мегьамед Мегьамедович Гьажиеван­ (1897-1958) тIварунихъ галай  пре­мия­­  лезги чIал хуьник, чируник, ахтармишуник, ам девлетлу авуник  пай  кутурбуруз гузва.

М. Гьажиеван премиядиз  «Лезги­ газетдин» редакцияда 40 йисалай гзаф вахтунда зегьмет чIугунин тежриба авай журналистикадин агъса­къал, хейлин йисара кьилин редактордин замес­титель хьайи,  алай вахтунда вичин гьар йикъан кIвалахда чIал виликди тухуниз, орфографиядин, пунктуациядин, стилистикадин къайдай­рал амал авуниз датIана артух фикир гузвай жавабдар секретарь­ Шихмурад ШИХМУРАДОВ ла­йихлу хьанва. Шихмурад Шагь-Эмировичан яратмишунрин рекьихъ галаз газет кIел­завайбур фадлай таниш я. Кьилди къачуртIа, алатай йисан 27-ноябр­диз акъатай 44-нумра­дай  ада лезги­ шаир, публицист ва тар­жумачи Пакизат Фатуллаевади­ гьа­зурнавай Лейлини Межнун» ктабдиз ганвай «Девиррилай даимбур» рецензия жа­гъида.

«ЙИСАН МЕСЭЛА»  конкурсдин пуд  премия. Президент Владимир Пу­тина алатай йис Ватан хуьзвайбурунди яз малумарнай. «Лезги газетдин» «Йисан месэла» конкурсни Ватан хуьнин рекье баркаллувал къазанмишайбурун, ватанпересвилин месэладихъ галаз алакъалу авуна.

РикIел хкин, «Йисан месэла» конкурс пуд паюникай-премиядикай ибарат я. И месэлайрай редакциядиз макъалаяр шаз гзаф атана. Иллаки — Ватандин ЧIехи дяведин йисара игитвилелди женг чIугур чи ватан­эгьлийрикай. Комиссиядин къарардалди, лайихлу хьана:

1-ПРЕМИЯДИЗ – 3000 манат – вичин ери-бине Ахцегь райондай тир Баламет ШИРИНОВ. Кьилди къачуртIа, Ахцегь райондин Мацарин­ хуьруьн чIехи сихилрикай сад тир Урдухановрин хизандай Ватандин ЧIе­хи дяведиз фейи, душмандихъ галаз­ къати женгера жуьрэтлувал къалу­рай ва еке шабагьриз лайихлу хьайи стхайрикай кхьенвай­ «Стхаяр-Урдухановар» (№18, 15-май) ва  Ватандин ЧIехи дяведин иштиракчи, ери-бине Мацай тир кьегьал,  «Яру гъед» ва Ватандин дяведин II дережадин орденрин сагьиб  Азиз Мухуровакай кхьенвай «Ватан хвейибурукай сад» (№23,19-июнь) макъалаяр къейд ийиз кIанзава.

2-ПРЕМИЯДИЗ – 2000 манат – ери-бине Кьурагь райондай чи автор­ Сабир ЭФЕНДИЕВ. Кьилди къа­чур­тIа, адан кьве макъала къейд ийиз­ кIан­зава: Украинада кьиле физвай махсус серенжемда сифте йикъари­лай иштиракай ва вичихъ аскердиз хас дирибашвал, къаст, жуьрэтлувал хьунай РФ-дин Президентдин­ къарардалди Жукован медалдиз ла­йихлу хьайи Вадим Селимовакай­ кхьенвай­ «Ватанперес рухваяр» (№22, 12-июнь), гьакIни Ватандин дяведин I дережадин, Баркаллувилин II дережадин орденрин ва са кьадар медалрин сагьиб Ибадуллагь Мегьамедовакай кхьенвай «Баркаллу штулви» (№25, 10-июль).

3-ПРЕМИЯДИЗ – 1000 манат – ери-бине Хив райондай тир, «Лезги­ газетдихъ» галаз яргъал йисара ала­къа хуьзвай мухбир, муаллим, тарихчи ва писатель Рамазан ВЕЛИБЕГОВ. Ватандин ЧIехи дяведин йисара гъалибвал къачуник чпин пай кутур муаллимрикай сад тир цналви Нямет Велихановакай, 1945-йисан 16-апрелдиз  рейхстаг къачун патал кьиле фейи женгера игитвилелди чан гайи адан баркаллу рекьикай кхьенвай «Чан Ватан патал къурбандна» (№24, 26-июнь) ва Ватандин ЧIехи дяведин женгера сифтедилай эхирдалди иштиракай Дербентдин педтехникумдин выпускникар тир Мегьа­меднаби Ибрагьимован, Паша Маме­дован, Юсуф Алимагьамедован уьмуьр­дин баркаллу рекьерикай  чап­диз акъатай «Ватан хвейи кьегьалар» (№25, 10-июль) макъалайрай.

«ГЬЕВЕС КУТАДАЙ  ПРЕМИЯ»­  — 1000 манат. Конкурсдин би­не­да яратмишунин рекье зегьмет чIуг­вазвай авторрин активвал къейд авун ава. И сеферда премия кьве касдиз гудай къарар кьабулнава. ИкI, премиядиз  ери-бине Мегьарамдхуьруьн райондин Муьгъверганрин хуьряй тир муаллим,  «Лезги­ газет» кIелзавайбуруз фадлай таниш, асул гьисабдай яша­йишдин месэлайрикай кхьизвай автор Абдулашим ГьАЖИМУРАДОВ­ ва ери-бине Вини СтIалдилай тир, ва­жиблу месэлайрикай кхьизвай  мух­бир Замир МЕГЬАМЕДОВ лайих­лу хьана.

«ЙИСАН МУХБИР» — 5000 манат.

И премиядиз «Лезги газетдин» хсуси корреспондент, са жерге ктаб­рин, гьакIни  Ахцегь райондин  экономикадиз, яшайишдиз, культурадиз ва са жерге маса месэлайриз талукь марагълу  жуьреба-жуьре макъалайрин автор Дашдемир Шерифалиев  лайихлу хьанва.

«ЦIИЙИ ТIВАРАР» — 3000 манат.­ 2025-йисалай башламишна, газетдин чинрал цIийи авторар желб авунин макьсаддалди  «Лезги газетдин»­ конкурсрал  мад сад – «ЦIийи тIва­рар» — алава хъийидай къарар кьабулнай. И конкурсдин гъалибчи Баку шегьердай тир  АЗИЗРИН (Азизова)  Севдадикай хьанва. Ам газет кIелзавайбуруз аялар патал лезги чIалал махарин ктабар акъуднавай автор яз таниш я.

ЦIийи йисан конкурсар

2026-йис патал малумарнавай конкурсра, кьадардал ва шартIарал гьалтайла, дегишвилер авач. ИкI, къуватда авай конкурсрин жергеда ава: «Гь. Гьажибегован премия»; «М. Гьажиеван премия»; «Йисан месэла»; «Йисан мухбир»; «Гьевес кутадай премия».

РФ-дин Президент Владимир Путинан къарардалди, 2026-йис Россиядин халкьарин садвилин йис яз малумарнава. И  йисан сергьятра аваз, Россиядин мулкунал къейддай кьве сувар пайда жеда: Россиядин Федерациядин тIимил авай бинелу халкьарин югъ – 30-апрель;  Россиядин Федерациядин халкьарин чIаларин югъ – 1-сентябрь.

Газетдин «Йисан месэла» конкурсни  халкьарин арада алакъайриз, милли чIалариз, халкьарин культура, меденият, ацукьун-къарагъун ахтармишуниз, инсанрин арада дуствилин алакъаяр хуьниз… талукьди жеда.

И конкурсдин премийрин кьадар виликдай хьиз амукьда:  3000 манат; 2000 манат ва 1000 манат. Макъа­лайрин жанрайриз фикир гудач, кьи­линди итижлу ва марагълу эсер кхьин я. Текстинин кьадар  4 чарчелай артух  ва шииррин кьадар 5 бендинилай тIимил тахьун лазим я.

«Гьевес кутадай премия» -1000 манат — газетдин чинал гьар жуьре­дин хци месэлайрай макъалаяр кхьиз­вайбуруз гузва. Жанрайрин тафаватлувал авач.

«Йисан мухбир» конкурсдин премиядалди —  5000 манат — «Лезги газетди»  виридалайни активнидаказ  кхьизвай,  хци  месэлаяр къарагъарзавай мухбиррин зегьмет къейдда.

«ЦIийи тIварар»  премия – 3000 манат. Конкурсдин шартIари яш, жанраяр ва темаяр сергьятламишзавач. Фикир гузва маналувилиз, итижлувилиз.

Умуд кутаз кIанзава хьи, цIийи авторар инлай кьулухъ мадни гзаф ва «Лезги газетдин» редакциядихъ галаз абурун алакъаяр анжах сих жеда. Алатай йисан конкурсрин гъалибчийриз чна яратмишунрин рекье хьанвай агалкьунар мубаракзава! Газетдихъ галаз алакъа хуьзвай  вирибурун яратмишунин гьевес ва илгьам  къуй мадни артух хьурай!

Гъалибчийривай дипломар ва премияр «Лезги газетдин» редакциядай вахчуз жеда.

Жасмина  Саидова