Уьлкведин Президент Владимир Путина Украинадихъ галаз ислягьвилин икьрар кутIунна, дяведин махсус серенжем акъвазардай рехъ фадлай хкянава. И карда адаз США-дин президент Дональд Трампани шериквал авун кутугай кар я. Амма коллективный западдин терс ва зиянлу макьамдал кьуьлзавай Зеленский лугьудай «фюрерди» женгериз мадни ва мадни аскерар ракъурзава, гьар гьафтеда абур агъзурралди телеф жезватIани.
Гьелбетда, дяведа Россиядин кьушунрикайни офицерар, аскерар, гьа гьисабдай яз, чи ватанэгьлиярни хкатзава. Кьурагь райондай дяведин махсус серенжемда иштиракзавай кьегьалрикайни са шумуд кас къизгъин женгера телеф хьана. Райондин администрацияди абурун хизанрин патахъай къайгъу чIугвазва, абуруз яшайишдин месэлаяр гьялиз куьмекзава.
И йикъара муниципалитетдин кьил Замир Азизов махсус серенжемда игитвилелди телеф хьайи Арабляр хуьряй тир Закир Къурбанован дидедихъни вахахъ галаз гуьруьшмиш хьана. Закир Къурбанов пуд аялдин буба тир.
Суьгьбетдин вахтунда райондин администрациядин кьили аскердин багърийриз башсагълугъвал гана, адан дидедиз, администрациядин тIварцIихъ авур яшайишдин арзайриз килигна, вири дердияр гьялунин карда куьмек гун хиве кьуна.
— Чна куь хцин, стхадин дирибашвилер рикIелай алуддач, — лагьана З. Азизова. — Ам халисан игит, чи райондин дамах я. Адан хизандин гьакъиндай къайгъу чIугун чи эвелимжи ва пак везифа я. Закир Къурбанов лайихлу хва ва чешнелу хизандин кьил тир. Ада миллетбазрихъ галаз кьиле фейи женгера Ватан кIан хьун, итимвал, аскервилин дирибашвал, кьинез вафалувал, уьтквемвал къалурна. Адаз уьлкведин Президентдин указдалди «Жуьрэтлувиляй» орден ганва.
Закир Къурбанован дидеди чеб кьабулунай, чпиз жедай куьмек гунай райондин регьбердиз сагърай лагьана.
Абад Азадов
