3-декабрдиз — инвалидрин международный Юкъуз Дербент шегьердин кьил Рустамбег Пирмегьамедов “Сергьят авачир мумкинвилерин бажарагъ” (Талант неограниченных возможностей) проектдин иштиракчийрихъ галаз гуьруьшмиш хьана. И проектдин тешкилатчи Дербент шегьердин администрациядин культурадин, жегьилрин политикадин ва спортдин рекьяй управление я. Гьаниз килигна ана и управленидин начальник Самиля Нажафовади, РД-дин лайихлу артист Руслан Пирвердиева, шегьердин кьилин куьмекчи, манидар Жасмина Гьабибулаевади ва масабуру иштиракна.
— И проектда сагъламвилин мумкинвилер сергьятламиш хьанвай, 12-40 йисалди яшда авай шегьердин агьалийри иштиракзава. Абуруз чпин яратмишунрин алакьунар ачухариз пешекар артистри, художникри, кьилди гьар садан мумкинвилер чирна, алакьунриз килигна, куьмекар гузва. Абур патал ше-гьердин лап хъсан муаллимри мастер-классар, ракъинин экуьнал тIебиатдин шикилар ядай, сес ачухдай (вокалдай) ва кьуьлер чирдай тарсар тешкилзава.
Мярекатдал рахай Самиля Нажафовадин гафаралди, и чка кьетlен аялри ва жегьилри муаллимрин-насигьатчийрин, артистрин, художникрин хуш гьалара чпин яратмишунрин мумкинвилер ачухдай майдандиз элкъвенва. И проектда иштиракзавай гьар са насигьатчиди, жаванриз шадвал багъишиз, гуьгьуьлар ачухиз, абурук гьевес кутаз, гьакъисуз кlвалахзава.
Шегьердин кьили проектдин иштиракчийрихъ галаз суьгьбетар авуна, абурувай чпиз кlани-такlан шейэрин патахъай хабарар кьуна, вуч лазим ятlа, лугьун тlалабна.
“Ихьтин проект кардик квайди чир хьайила, заз и мярекатда иштиракиз кlан хьана”, — лагьана Рустамбег Пирмегьамедова. Тешкилатчийриз ва муаллимриз-насигьатчийриз сагърай лагьана ва и проектдик шегьердин администрацияди гележегдани къуьн кутадайдахъ инанмишарна.
Мярекатдин эхирдай шегьердин кьилин патай аялриз пишкешар гана ва рикlел аламукьдай шикил яна.
Къагьриман Ибрагьимов
