Кьурагь райондин Гелхенрин хуьре мусурман календарда кьетIенди тир Мугьаммад пайгъамбар (с.а.с) хайи Рабиуль-авваль вацраз талукьарнавай межлис кьиле фена.

Мярекатда Кьурагь райондин имам Магьди Апаева, РД-дин Муфтиятдин чирвилерин отделдин Кьурагь районда авай векил Рамазан Бугаева, хуьруьн администрациядин кьил Умалат Гьайдарова иштиракна.

Межлис Гелхенрин хуьруьн мискIиндин имам Манаф Ибеева ачухна ва кьиле тухвана. Сифте гаф Магьди Апаева лагьана.

Райондин имамди пак вацран важиблувиликай, Пайгъамбардин (с.а.с.) тарихдикай,  мусурманриз чешне хьун чарасуз тир адан уьтквем къилихрикай суьгьбетна. Ада къейд авурвал, гьар са касди Пайгъамбардиз (с.а.с.) чи патай авай гьуьрмет, кIанивал са къенин мярекатдалди акьалтIарна кIандач. Ам гьамиша рикIе хьана кIанзавайди, адаз авай кIанивал неинки са ихтилатралди, гьакI дуьз къилихралдини къени краралди къалурна кIандайдакай лагьана. Мадни имамди Пайгъамбардиз (с.а.с.) тешпигь яз адан хъсан ерияр — рахунрин ва рафтарвилин хъуьтуьлвал, четин вахтунда сабурлувал, имандал кIеви хьун,  рикIера авай ажугъ акъудун, мецин харчивал, векъивал тавун, инсанриз гьамиша чешне хьунин игьтияж авайди   къейдна.

“Гьар са карда, гьерекатда Пайгъамбардин (с.а.с.) къилихар, ада вич тухвай тегьер чешне хьайитIа, чун чешнелу уьмметдиз элкъведа. Мугьаммадан (с.а.с.) мурадни гьам тир. Къуй и карда чаз  Аллагьдикай куьмек хьурай”,- алава хъувуна М.Апаева.

Адалай гуьгъуьниз рахай Рамазан Бугаева вири патарихъай чирвилер къачун ва Пайгъамбардин  (с.а.с.) къилихар вине кьун инсанри чеб тухунин, хуьре-кIвале, районда, республикада, вири санлай уьлкведа ислягьвал хьунин замин тирди лагьана.

Сейфудин Шагьпазов