Мегьарамдхуьруьн райондин уьзуьмчийри муниципалитетдин кьил Фарид Агьмедовавай меслятдалди куьмек гун тIалабна — ципицIлухрин майданар гегьеншарун ва и хел виликди тухун патал абуруз районда гьихьтин сортар цун кутугнаватIа, чириз кIанзавай, хабар гузва райондин информациядин центради.
Ф.Агьмедован тапшуругъдалди, райондин хуьруьн майишатдин отделди Къизлярдин коньякар акъуддай заводдин пешекарриз мугьманвилиз атун теклифна.
РикIел хкин, Мегьарамдхуьруьн район республикадин хуьруьн майишатдин хел активнидаказ виликди тухузвай чIехи районрикай сад я.
Райондин кьили и хел агалкьунралди вилик тухуниз талукь месэлайриз дикъет гузва. Асул фикир багъманчивилин ва уьзуьмчивилин рекьериз гузва, гуьгъуьнал алай хилерик майвачивални малдарвал акатзава.
Къизлярдин коньякрин заводдин пешекарри, Мегьарамдхуьруьн райондиз атайла, уьзуьмчивилин майишатар ахтармишна, лежберрихъ галаз суьгьбетарна.
Ихьтин майишатрикай сад “Гранит” СПК я. Ина хкянавай еридин (элитный) сортарин ципицIар гьасилиз 5 йисалай гзаф вахт я.
Майишатдин руководитель Разим Агьмедова вичи ципицIрин ерилу сортар битмишарун патал гьихьтин технологияр ишлемишзаватIа суьгьбетна. ИкI, малум хьайивал, ина 15 гектардин чилел “Лора”, “Кишмиш”, “Венгерский”, “Экспресс юбилейный” ва са жерге маса жуьрейрин ципицIар гьасилзава.
Къейд ийин, 2020-йисан 20-июндилай Россияда уьзуьмчивилин ва чехирчивилин гьакъиндай закон къуватда гьатнава. Ада уьлкведа ципицIар гьасилунин хел виликди тухуз куьмек гун лазим я.
ЦIийи закондалди, чехирчивал Россияда кьилдин хел яз чара авунва. Закондин бинеда производствода ватандин чилел гьасилзавай ципицIар ишлемишзавай чехирчийриз куьмек гун ава.
Россиядин экономикадин рекьяй виликди финин министрдин сад лагьай заместитель Михаил Бабича къейд авурвал, Дагъустандихъ ципицIар гьасилунин ва гьялунин хел виликди тухунин рекьяй еке мумкинвилер ава.
РД-дин хуьруьн майишатдин ва недай суьрсетдин министерстводи къейдзавайвал, Дагъустанда ципицIлухри кьунвай чилерин санлай къачур майдан 25 агъзур гектардилай виниз я. Мегьарамдхуьруьн районда уьзуьмлухрин умуми майдан 1959 гектардиз барабар я. Алай вахтунда абурукай 1900 гектарда цанвай ципицIри бегьер гузва.
«Лезги газет»
