Кьве сеферда артухарда
Дагъустанда 2025-йисалди балугъар кьунин кьадар 70 агъзур тонндив агакьардай ниятар ава. Балугърин майишатдин комитетдин делилралди, алай вахтунда гьар йисуз саки 33 агъзур тонн балугъар кьазва. Идакай «Дагъустандин экономика» телеграм-каналди хабар гузва.
ГьакIни комитетдиз балугърин продукция гьялунин кьадар 7,5 агъзур тонндив агакьариз кIанзава. Гьа са вахтунда республикадин балугъчивилин майишат вилик тухунин программадин сергьятра аваз и хилез 12 миллиард манат (адакай 1 миллиард манат — республикадин бюджетдай) чара авун фикирдиз къачунва.
Къейдзавайвал, балугъар кьунин кьадар артухаруникди, и хиле кардик квай карханайра кIвалахдай 1,5 агъзур чкани арадал къведа.
Къунши регионрай
Дагъустандин аграрийри зулухъай цазвай магьсулрин тумар къунши регионрай маса къачузва. Идакай РД-дин хуьруьн майишатдин ва недай суьрсетдин министерстводин пресс-къуллугъди хабар гузва.
Санлай къачурла, 2023-йисуз республикадин аграрийри 210 агъзур тонндив агакьна зулуз цадай магьсулрин бегьер кIватI хъувуна. 2022-йисав гекъигайла, и рекъем 8,6 процентдин тIимил я. Алатай йисуз адан кьадар – 228, 2021-йисуз лагьайтIа, 212 агъзур тонн тир.
Алай вахтунда аграрияр 2024-йисан бегьер патал зулун тумар цаз эгечIнава. Къейдзавайвал, магьсулрин тумар иллаки Краснодардин ва Ставрополдин крайрай, гьакIни Ростовдин областдай гъизва.
Министерстводин пресс-къуллугъди алава хъувурвал, республикада авай хуьруьн майишатдин метлебдин мулкарин умуми гьисабдикай 10 процент майданра сечме тумар цада.
Серенжемар кьиле тухуда
Декабрдин вацралди Дагъустанда пешекарри четин гьалда авай ва гуж ацалтзавай энергетикадин объектар цIийикIа туькIуьр хъийида. Идакай ПАО «Россети Северный Кавказ» компаниядин кьилин инженер Виктор Абаимован гафарал асаслу яз, «Дагъустандин экономика» телеграм-каналди хабар гузва.
Адан гафаралди, 2023-йисан декабрдин вацран юкьваралди компанияди 19 трансформатордиз талукь тир серенжемар кьиле тухуда. И объектар къурхудик квайбур ва алатай йисан хъуьтIуьз виридалайни пара гуж ацалтнавайбур я.
Виктор Абаимова гьакIни хабар гайивал, энергетикадин объектрал кьиле тухузвай серенжемрихъ галаз алакъалу яз Махачкъалада мукьвал-мукьвал эквер хкудуниз мажбур жеда.
Чешмеди мадни къейдзавайвал, республикади энергосетар хъуьтIуьз гьазурун патал федеральный бюджетдай алава яз 1,2 миллиард манат пул къачунва. И такьатар уьлкведин финансрин министерстводи чара авунва. Ведомстводин кьил Антон Силуанова къейд авурвал, Дагъустан, Кеферпатан Кавказдин маса регионрихъ галаз санал, электричестводалди таъминарунин кар хъсанарунин жигьетдай федеральный центради сифте нубатда фикир гузвайбурукай сад я.
Лагьана кIанда, тек са Махачкъала дурумлудаказ энергиядалди таъминарунин жигьетдай серенжемар кьиле тухудай кьилдин программа арадал гъанва. Адан сергьятра аваз тамамардай кIвалахриз санлай къачурла 4,1 миллиард манатдив агакьна пулдин такьатар акъатда.
Виликдай хабар гайивал, Дагъустандин электроэнергиядалди таъминардай къурулушар цIийикIа туькIуьр хъувун патал 10 миллиард манатдив агакьна пулдин такьатар герек къвезва.
Гьазурайди — Муса Агьмедов
