Дидедин веси
Уьмуьр кьакьан гурар язва вахтунин,
Цавун аршдик кутунвай са легьзеда.
Жуван гъиле яхъ на куьлег бахтунин,
А гурариз кам вегьейла, чан бала.
Сифте кIарцIиз кам вегьез лап четин я,
Татаб тахьуй, чан зи бала, килиг гьа!
А вахтунда малаикар секин я,
ЭрчIи къуьнуьхъ зигьиндин таж гилиг гьа!
Ирид лагьай кIарцIиз на кам вегьейла,
Ахъа жеда илимдин рак, гьелбетда.
Вун а кIарцIел мукъаят хьухь, чан бала,
Гележегдин эквер ава гьебеда.
ЦIукьуд лагьай кIар са кIус кьван гужлу я,
Адакай ваз хабар жедач шадвиляй.
А береда акьулдин рак гурлу я,
Адан хилез кьацI тагуз хьуй, чан бала.
Къад лагьай кIар муьгьуьббатдин леле я,
А леледа къугъваз жеда кьведан руьгь.
Муьгьуьббат са къати гьуьлуьн лепе я,
Адан хура гьат тежез хьуй, чан бала.
ЯхцIурни цIуд лагьай кIарцIи ян гуда,
На а кIарцIел тIарамдиз кIвач эцига.
Велед патал чи дидейри чан гуда,
Абурун рикIиз тIар жез тахьуй, чан бала.
Кьилин кIарцIяй аватиз вун хьайитIа,
Вав дидеди цавун аршдай гъил гуда.
А гурарин куьлегар ваз гайитIа,
Виш йис авай рак ачуха, чан бала.
Хъфизва…
Хъфизва зи кьуьзуьбур:
Зун хайибур, хвейибур,
Зун арадал гъайибур,
Заз фу-къафун гайибур.
Хкахьзава кIвалин эквер,
Гьарай, эллер, гузва эвер!
Хъфизва зи кьуьзуьбур:
Дараматар авурбур,
Зегьметдин тIал акурбур,
Уьмуьрдин дад такурбур,
Зи гафарихъ агъурбур,
Къарагъ кIвачел, гузва эвер!
Хъфизва зи кьуьзуьбур:
ЧIехи хизан хвейибур,
Чаз тербия гайибур,
Тандал партал цвайибур,
Дяведи рикI кайибур.
Хкахьзава экуь гъетер,
Азиз эллер, гузва эвер!
Хъфизва зи кьуьзуьбур:
КIвачихъ девлет галайбур,
Кьилел бармак алайбур,
Чаз дуьз рекьер къалайбур,
Аферинар алайбур…
Аман, Аллагь, вучдатIа лагь!!!
Хъфизва зи кьуьзуьбур…
Соня Ибрамхалилова
АкI кьадай хьи!
( Зарафатдин манияр )
Келемдикай авур дулма,
Картуф галай ягълу шурва,
Чайдихъ галаз са кIус гьалва,
Агь, зи чандив акI кьадай хьи!
Гьатна сиве шишинин дад,
Къачуна са лапагдин пад,
ЯгъайтIа шиш гьа икI фад-фад,
Агь, зи чандив акI кьадай хьи!
Гагь кIан жеда кишмиш квай аш,
Арайраваз хъипи машмаш,
ЧIалахъ туштIа, куьнни тамаш,
Агь, зи чандив акI кьадай хьи!
Дуьшперини хъчад хинкIал,
Кьурай якни, куьрсна тарал,
Хкведалди аял-куял,
Агь, зи чандив акI кьадай хьи!
ЯкIун цIикен жедач гьарам,
ЧIем кIвахьна физ чраз тIарам.
Къуватдизни жеда хуррам,
Агь, зи чандив акI кьадай хьи!
Хкадариз ийидай кьуьл,
ЖагъанайтIа са торт хъуьтуьл,
Вегьедай за адал кьве гъил,
Агь, зи чандив акI кьадай хьи!
И шейэрлай яз алава,
КIан жеда хвех квай пахлава.
Зи руфуниз жедай дава,
Агь, зи чандив акI кьадай хьи!
Мад амани талгьай къафун?
Гьикьван тIуьнкай жеда рахун?
Пад хьайитIа вучда руфун?..
Агь, зи чавдив акI кьадай хьи!..
Светлана Гьажиева
Ялварзава за…
Эй цавар-чилер, куьн я чи кьисмет,
Сад Аллагьди чаз багъишнавай бахт.
Эй къулавай цIай, вун я чаз герек,
Гъуцарин патай алхишнавай тахт.
Эй маргъвар, живер, берекат чилин,
Дагъларай кIаниз цIраз, авахьиз,
ВацIарни кIамар, чуьллер тухариз,
Къудратлувал генг лап артухариз…
Эй гуьзел гатфар, ракъинин нурар,
Чим гузвай чилиз, накьвар уяхриз,
Такабурвилелд къвазвай марфар,
Артухриз ятар, къведай булахриз…
Ялварзава за, эй цавар — чилер,
Михьиз амукьрай, гуьзел тIебиат.
Халкьдиз ачухиз алемдин сирер,
Вирибруз хьурай девран, гьуьруьят.
Аршдиз килигиз, акъвазнава зун,
КIевиз, ачухиз тежез рикIин сир.
Секинарзава гьайбатди цавун
Гъамлу хиялар деринра рикIин.
Жемир инсафсуз, эй инсанар, куьн,
Хуьх пак тIебиат — аямдин савкьат!
Чир хьухь кьадар квез гьарма са куьнин,
Тежедайвал Чил садрани барбатI!..
Назифа Юркъулиева
