29-январдиз Дагъустандин Кьилин везифаяр вахтуналди тамамарзавай  Владимир Васильев РФ-дин  экономикадин рекьяй вилик финин министрдин заместитель — государстводин регистрациядин, кадастрдин ва картографиядин Федеральный къуллугъдин руководитель Виктория Абрамченкодихъ галаз гуьруьшмиш хьана.

Виктория Абрамченкоди мугьманвилиз теклиф авунай чухсагъул лагьана ва республикадихъ инвестицийрин ре­кьяй­ хъсан мумкинвилер авайди, чилеринни эменнидин комплекс чилерин ва объ­ектрин жуьреба-жуьре категорийралди таъмин тирди къейдна.

“Чаз Махачкъалада эцигунрин еке активвал авайди акуна. Регионда хъсандиз тешкилнавай  кIвалахдилай,  вичи-вич идара ийидай чкадин органрилай ва чи къуллугъдилай чилеринни эменнидин алакъайрин ва инвестицийрин ­мумкинвилерин нетижалу политика ас­лу я”, — къейдна Росреестрдин руководителди.

Федеральный ведомстводин кьили алава хъувуна хьи, Дагъустандин мулкарал государстводин ва муниципальный къуллугърай куьмекар гун патал гзаф везифайрин центраяр кардик ква.

Ихтилат давамаруналди, Владимир Васильева рикIел хкана хьи, мукьвара Дагъустандин чилерин ва эменнидин алакъайрай министр къуллугъдикай азадна. “Идахъ галаз алакъалу яз за фи­кирзава хьи, чи саналди тир кIва­лахди исятда неинки и хиле къайда тваз, гьакI­ни чун патал важиблу тир и къуллугъда лайихлу ксар кIвалахал хкягъиз куьмек гуда”, — лагьана В.Васильева.

Идахъ галаз сад хьиз алай вахтунда­ Да­гъустанда кIвалах­завай Россиядин Генеральный прокуратурадин пешекарри ахтармишунар авунин нетижада кIва­лер эцигун патал ишлемишун лазим тушир майданар чара авунвай дуьшуьшар дуьздал акъудна.

В.Абрамченкоди къейдна хьи, и месэладиз Росреестрди кьетIен фикир гузва: “Шад жедай кар ам я хьи, эхиримжи пуд вацра Федеральный закондин къайдайрал амал ийизва ва судрин къарарралди кIвалер эцигун лазим тушир чкайра абур эцигун законламишзавай къарарар акъудзамач. Гьакъикъатда ла­гьай­тIа, судди регистратор гьатта чилин и участокдал гьич садрани пайда тахьун ла­зим тир объектар регистрация авунин их­тияррикай отказ авуникай магьрумзава”.

Гуьруьшдин эхирдай Владимир Васильева государстводин регистрациядин, кадастрдин ва картографиядин Федеральный  къуллугъдин руководителдиз чилерин гьахъ-гьисабдин къайда дуьздаказ кьилиз акъудунай чухсагъул лагьана. Адан фикирдалди, им къенин юкъуз республика вилик финин бине я.  РД-дин Кьилин везифаяр вахтуналди тамамарзавай  В.Васильева гележегдани бегьерлудаказ санал кIва­лах­дай­дак умуд кутуна. Идалайни гъейри, серенжемрин сергьятра аваз Дагъустандин государстводин властдин органрин са шумуд къуллугъчи методикадин рекьяй куьмек къачун патал Росреестрдиз стажировкадиз рекье тунин гьакъиндайни икьрар хьана.

«Лезги Газет»