И йикъара Дагъустан Республикадин Кьил Сергей Меликова республикадин призывдин комиссиядин ва Оперативный штабдин саналди тир заседание кьиле тухвана. Малум хьайивал, Россиядин армиядиз жегьилриз эвер гунин кIвалах тешкиллудаказ кьиле физва. Армиядиз 2006-1994-йисара дидедиз хьайи гадайриз эверзава. Абур кьушунрин вири жуьрейрин частариз, гьакI сергьятар хуьзвай подразделенийризни тухузва.
Региондин Кьилин гафаралди, кампания тайинарнавай пландин бинедаллаз кьиле физва. Гьа са вахтунда призывдин бязи комиссийри ва муниципалитетрин военкоматри нукьсанризни рехъ гузва.
Абурукай гегьеншдиз республикадин военный комиссар Дайтбег Мустафаева малумат гана. Ада вилик эцигнавай везифаяр тамамарун патал кьабулзавай серенжемрикайни лагьана. ИкI, военкоматди шегьеррин ва районрин военный комиссариатриз жуьреба-жуьре рекьерай куьмекар гузва. И кардал прокуратурадин, ОВД-дин, администрациядин къуллугъчияр, собранийрин депутатар желбзава.
Республикадин военкомди малумарайвал, Махачкъаладин ва Каспийскдин администрацийри жегьилар армиядиз желб авунин кIвалах хъсандиз тешкилнава. Региондин Кьили абур маса муниципалитетриз чешне яз къалурна.
— Армияда къуллугъ авун Конституциядин буржи кьилиз акъудун я, — лагьана Сергей Меликова. — Шегьерра, районра призывдин комиссийрин кьиле муниципалитетрин регьберар акъвазнава. Куьне призывникрихъ, абурун диде-бубайрихъ галаз датIана гъавурдик кутунин кIвалах тухун герек я. Армиядикай кьил къакъудзавайбур тежедайвал.
Заседанидал мадни къейд хъувуна хьи, армиядиз тухузвай жегьилри дяведин махсус серенжемда иштиракдач.
Хийир Эмиров
