Эхиримжи вахтара Москвадин, Киевдин, Константинополдин хашпара дин ­­вяз ийизвайбурун арада хьанвай чуьруькар акьалтIзавач. Гьарма сада вич гьахъариз алахьзава. 

Абурухъ яб акалдай кьван са ихьтин кар хтана зи рикIел. 2009-йис тир. Центральный телевиденидай Астрахандай тир Ватандин ЧIехи дяведин ветеран Георгий Степановакай передача гузвай.  Лугьузвай хьи, ам 1,5х2 метр алай ракьун контейнерда яшамиш  жез пуд йис я. Са ни ятIани адан кIвалин иесивалнавай. Кесиб ветеранди, вучиз вич рейхстаг къачудай вахтунда са немс­ди гуьлледай яначир лугьуз, гьайифар чIугвазвай. Гьа вахтунда кье­найтIа, къе и азабар чIугун кьисмет жедачир лугьузвай.

Гьа и передачадилай гуьгъуьниз гъиле-гъил аваз патриарх Кирилл а чIавуз РФ-дин Президент Д.Медведевахъ галаз  гуьруьшмиш хьанай ва ада Воскресенскда авай килиса сифте авай гьалдиз хкун патал чIехи пулар ахъаюн тIалабнай. Зун ихьтин фикирдал атана: сифте нубатда Георгий Степанов ва ам хьтин гзаф масабурун, етимрин, масадан куьмекдихъ муьгьтеж хьанвай аялрин къайгъу чIугун, ахпа килисайрин, маса ибадатханайрин дердийриз килигун лазим я. Эгер абур Аллагьдихъ рикI куз­вай ксар ятIа, масакIа хьун лазим туш.

Шагьабудин Шабатов